Jalgaon News : दिवाळीत फटाक्यांमुळे वायूप्रदूषण होते. फटाक्यांच्या धुरामुळे अनेकांना श्‍वसनाचे विकार होतात. वृद्ध, लहान मुलांना फटाक्यांचा आवाज सहन होत नाही. यामुळे त्यांना कर्णबधीरपणा येऊ शकतो. फटाक्यांमुळे हवेचे, आवाजाचे प्रदूषण होते.

ते रोखण्यासाठी पर्यावरणपूरक फटाके फोडण्याचे आवाहन प्रदूषण नियंत्रण मंडळाने केले आहे. शहरातील वायू व ध्वनीची मोजणी सुरू आहे. तीन ठिकाणी धूर व वायूमोजणी केंद्रे सुरू आहे, अशी माहिती प्रदूषण नियंत्रण अधिकारी करणसिंग राजपूत यांनी दिली.

एमआयडीसी परिसर, गिरणा पाण्याची टाकी, जुने बी. जे. मार्केट येथे हे केंद्रे असतील. या केंद्रावर दिवाळीत वायू व ध्वनीचे प्रदूषण मोजले जाणार आहे. या केंद्रांवर अधिक प्रदूषण होत असल्याचे लक्षात आल्यास त्वरित महापालिकेला जिल्हा प्रशासनाने नेमलेल्या अधिकाऱ्यांना त्या एरियाचे नाव सांगून तेथे प्रदूषण होणार नाही.

याची दक्षता घेण्याच्या सूचना दिल्या जातील. नागरिकांनीही पर्यावरणपूरक फटाके मोकळ्या जागेत फोडावेत. अपार्टमेंट, मोठ्या हाॅलच्या ठिकाणी फटाके फोडल्यास प्रदूषण होऊन वृद्ध, बालकांना त्रास अधिक होईल. नागरिकांची काळजी घेतल्यास सर्वांचाच त्रास वाचेल. ध्वनी व वायू प्रदूषणामुळे होणारे संभाव्य धोके टळतील, असे विभागाकडून सांगण्यात आले.