Sindhudurg News : जिल्ह्यातील तळकट (ता. दोडामार्ग) श्‍वेता श्रीनिवास बर्वे या तरुणीने सुपारीच्या विरी (पौली)पासून बनविलेल्या पर्यावरणपूरक चपलांनाला पेटंट मिळाले आहे. तिच्या कौशल्याचे वैज्ञानिक डॉ. रघुनाथ माशेलकर यांनी कौतुक केले आहे.

सिंधुदुर्गात सुपारीची मोठ्या प्रमाणात लागवड आहे. मागील काही वर्षांत सुपारीच्या पानांपासून पत्रावळी, द्रोण, चमचे यांसह विविध वस्तू बनविल्या जातात. परंतु तळकट येथील श्‍वेता बर्वे या तरुणीने सुपारीच्या विरीपासून चपला बनविल्या आहेत.

या चपलांना पेटंट मिळावे यासाठी तिचे गेल्या काही महिन्यांपासून प्रयत्न सुरू होते. तिने कौशल्यातून बनविलेल्या या चपलांना तिच्या नावाने पेटंट मिळाले आहे. ही पर्यावरणपूरक चप्पल आकर्षक आहे. ही चप्पल बनविण्यापूर्वी तिने यासंदर्भातील प्रशिक्षण घेतले होते.

लवकरच श्‍वेता या चप्पल बनविण्याचा व्यवसाय तळकट येथे सुरू करणार आहेत. त्यामुळे वाया जाणाऱ्या सुपारीच्या विरीला देखील किंमत मिळणार आहे.

प्रति विरी दोन रुपये दराने त्या खरेदी करणार आहेत. चप्पल बनविण्यासाठी आवश्यक मशिन खरेदीची प्रकिया सुरू असून, येत्या काही महिन्यांत हा व्यवसाय त्या सुरू करणार आहेत.