Parbhani News : जिल्ह्यात जुलैच्या पहिल्या आठवड्यात जोरदार पाऊस झाला नाही. बाष्पीभवन, उपशामुळे लघु व मध्यम प्रकल्पातील पाणीसाठ्यात घट होत आहे. मागील आठवड्यात दोन लघु व एका मध्यम प्रकल्पातील पाणीसाठ्यात घट झाली आहे. भोसी (ता. जिंतूर) येथील लघु तलाव अद्याप कोरडाच असून १५ लघु तलावांतील पाणीसाठा जोत्याखाली आहे.

गुरुवारी (ता. ३) घेतलेल्या नोंदीनुसार लघु प्रकल्पांमध्ये ३.८४१ दलघमीनुसार सरासरी ९ टक्के तर दोन मध्यम प्रकल्पांमध्ये सरासरी ७.००८ दलघमीनुसार १३ टक्के पाणीसाठा होता. जायकवाडी पाटबंधारे विभाग अंतर्गंत परभणी जिल्ह्यातील २१ व जालना जिल्ह्यातील लघु सिंचन प्रकल्पांची पूर्ण जल क्षमता सरासरी ४५.८२७ दलघमी तर उपयुक्त पाणीसाठा क्षमता ४२.२०५ दलघमी आहे. मे महिन्यात सरासरीहून अधिक पूर्वमोसमी पाऊस झाला.

परिणामी कोरड्या पडलेल्या लघु तलावात पाणीसाठा जमा झाला होता. परंतु जून मध्ये सरासरीहून ६५ मिमी कमी पाऊस झाला. जुलै मध्ये पावसाचा जोर नाही.तुरळक पाऊस सुरु आहे. अनेक प्रकल्पातील पाणीसाठ्यात घट-वाढ होत आहे. मागील आठवडभरात झरी (ता. पाथरी), पिंपळदरी (ता. गंगाखेड) येथील लघु तलावातील पाणीसाठ्यात अनुक्रमे १ टक्का व ३ टक्के घट झाली.

लघु प्रकल्पात ९ टक्के पाणीसाठा

गुरुवारी (ता. ३) घेतलेल्या नोंदीनुसार भोसी (ता. जिंतूर) लघु तलाव कोरडा पडलेला होता. पेडगाव (ता. परभणी), आंबेगाव (ता. मानवत), नखातवाडी (ता. सोनपेठ), टाकळगाव, कोद्री (ता. गंगाखेड), देवगाव, जोगवाडा, बेलखेडा, चारठाणा, चिंचोली, आडगाव, केहाळ, कवडा, दहेगाव, मांडवी (सर्व ता. जिंतूर) या १५ तलावातील पाणीसाठा जोत्याखाली आहे.

वडाळी (ता. जिंतूर) येथील लघु तलावात १० टक्के, पाडाळी (जि. जालना) येथील लघु तलावामध्ये ११ टक्के पाणीसाठा होता. झरी (ता. पाथरी) येथील लघु तलावामध्ये ६९ टक्के, राणीसावरगाव (ता. गंगाखेड) येथील लघु तलावात १० टक्के, पिंपळदरी (ता.गंगाखेड) येथील लघु तलावामध्ये ३७ टक्के तर तांदुळवाडी (ता. पालम) येथील लघु तलावामध्ये ८ टक्के पाणीसाठा होता. २०२४ मध्ये ३ जुलै रोजी लघु प्रकल्पांमध्ये सरासरी ०.४८४ दलघमी (२ टक्के) पाणीसाठा होता. त्यावेळी २ लघु तलाव कोरडे पडले होते तर १६ लघु प्रकल्पांतील पाणीसाठा जोत्याखाली होता.

मध्यम प्रकल्पात १३ टक्के पाणीसाठा

करपरा मध्यम प्रकल्पाची पूर्ण जल क्षमता २८.८२० दलमघी असून त्यापैकी उपयुक्त साठा क्षमता २४.९०० दलघमी आहे. मासोळी मध्यम प्रकल्पाची पूर्ण जल क्षमता ३४.०८५ दलघमी असून त्यापैकी उपयुक्त साठा २७.१४१ दलघमी आहे. गुरुवारी (ता. ३) घेतलेल्या नोंदीनुसार करपरा प्रकल्पात १.७९८ दलघमी नुसार ७ टक्के तर मासोळी मध्यम प्रकल्पांमध्ये ५.२१० दलघमी नुसार १९ टक्के उपयुक्त पाणीसाठा होता.

करपरा (ता. जिंतूर) मध्यम प्रकल्पातील पाणीसाठा मागील आठवड्याप्रमाणे जैथे थे होता तर मासोळी (ता. गंगाखेड) मध्यम प्रकल्पातील पाणीसाठ्यात १ टक्याने घट झाली. दोन मध्यम प्रकल्पातील सरासरी पाणीसाठ्यात २ टक्क्यांनी घट होऊन सरासरी ७.००८ दलघमीनुसार १३ टक्के पाणीसाठा होता. २०२४ मध्ये ३ जुलै रोजी करपरा मध्यम प्रकल्पामध्ये उपयुक्त पाणीसाठा नव्हता. मासोळी मध्यम प्रकल्पातील पाणीसाठा जोत्याखाली होता.