Punjab News : संयुक्त किसान मोर्चा (गैरराजकीय) आणि किसान मजदूर मोर्चाच्या वतीने बुधवारी (ता. १८) पंजाबमध्ये ‘रेले रोको’ आंदोलनाची हाक देण्यात आली होती. या आंदोलनात दुपारी १२ ते ३ या वेळेत विविध रेल्वे मार्गांवर शेतकऱ्यांनी ठिय्या देऊन रेल्वे मार्ग रोखले.

दरम्यान, किसान मजदूर संघर्ष समितीचे सरचिटणीस सर्वन सिंग पंढेर यांनी सांगितले, की शेतकरी भविष्यात मोठे आंदोलन आयोजित करण्याची योजना आखत आहेत आणि त्याबाबतची घोषणा लवकरच केली जाईल.

अमृतसरमधील देवी दासपुरा येथील आंदोलनात सर्वन सिंग पंढेर यांनी भाग घेततला. ते म्हणाले, की अहवालांतील माहितीनुसार २०२२ मध्ये शेतकऱ्यांना एमएसपी न मिळाल्याने त्यांचे अंदाजे १५ लाख कोटी आणि २०२३ मध्ये ८.५ लाख कोटींचे नुकसान झाले आहे. आम्ही भविष्यात मोठ्या आंदोलनासाठी तयार आहोत.

आज ना उद्या आम्ही त्याची घोषणा करू.

दरम्यान, संयुक्त किसान मोर्चाचे (गैर-राजकीय) निमंत्रक जगजित सिंग डल्लेवाल म्हणाले, की आंदोलक शेतकरी सर्वोच्च न्यायालयाने स्थापन केलेल्या समितीला भेटणार नाहीत.’ बुधवारी या समितीसमवेत शेतकऱ्यांची बैठक होणार होती, मात्र त्यांनी बैठक नाकारली.

आत्महत्येचा प्रयत्न करणाऱ्याचा मृत्यू

शेतकऱ्यांच्या निषेधादरम्यान शनिवारी (ता. १४) विषारी द्रव्य प्राशन करून शंभू सीमेवर आत्महत्येचा प्रयत्न करणारे लुधियाना जिल्ह्यातील रतनहेरी गावातील शेतकरी रणजोध सिंग (वय ५७) बुधवारी (ता. १८) येथील शासकीय राजिंद्र रुग्णालयात मृत्यू झाला, असे शेतकरी नेत्यांनी सांगितले.

२६ नोव्हेंबरपासून खनौरी सीमेवर बेमुदत उपोषणाला बसलेले शेतकरी नेते जगजित सिंग डल्लेवाल यांची प्रकृती बिघडल्याने रणजोध सिंग यांनी हे टोकाचे पाऊल उचलल्याचे शेतकरी नेत्यांनी सांगितले. सिंह यांच्या पश्चात आई-वडील, पत्नी, मुलगी आणि एक मुलगा असा परिवार आहे. विविध मागण्यांच्या समर्थनार्थ शंभू सीमेवर सुरू असलेल्या आंदोलनात ते सहभागी झाले होते.