Sindhudurg News : भातरोपवाटिका तयार करण्यापासून ते पुर्नलागवडीस पोषक पाऊस झाल्यामुळे जिल्ह्यातील भातरोप पुनर्लागवड पूर्ण झाली आहे. जिल्ह्यात यावर्षी ६२ हजार ५०० हेक्टरवर भातरोप पुनर्लागवड झाली आहे.

जिल्ह्यात खरीप हंगामात मोठ्या प्रमाणात भातपीक उत्पादन घेतले जाते. या वर्षी कृषी विभागाने ६३ हजार हेक्टरवर भातपीक लागवड होईल, असा अंदाज दिला होता. या वर्षी २० मेपासून मॉन्सूनपूर्व पाऊस आणि ६ जूनला मॉन्सूनचा पाऊस सुरू झाला.

त्यामुळे भातरोपवाटिका तयार करताना कोणतीही अडचण शेतकऱ्यांना आली नाही. शेतकऱ्यांना भातबियाणे आणि खतेदेखील वेळेत मिळाली. त्यामुळे जूनच्या २२ तारखेपर्यंत बहुतांश शेतकऱ्यांच्या भातरोपवाटिका तयार झाल्या होत्या. ६ हजार २०० हेक्टरवर भातरोपवाटिका तयार करण्यात आल्या होत्या.

या वर्षी पहिल्या आणि दुसऱ्या टप्प्यातील भातरोप पुनर्लागवड साधारणपणे जूनच्या अखेरच्या आठवड्यात सुरू झाली. त्यानंतर आठ ते दहा दिवसांनी नियमित भातरोप पुनर्लागवडीला सुरुवात झाली.

जिल्ह्यातील ७५ टक्के पुनर्लागवड ही पावसाच्या पाण्यावर अवलंबून असते. परंतु या वर्षी लागवडीला प्रारंभ केल्यापासून अखंडपणे पाऊस बरसला. त्यामुळे पुनर्लागवडीत अजिबात खंड पडला नाही. काही पाणथळ जमिनीतील लागवडी मुसळधार पावसामुळे रखडल्या होत्या. परंतु भातरोप लागवड आता पूर्ण झाली आहे. जिल्ह्यातील ६२ हजार ५०० हेक्टरवर भातरोप लागवड करण्यात आली आहे.