Yavatmal News : यवतमाळ जिल्ह्यातील चार लाख ३९१ शेतकऱ्यांनी आतापर्यंत तीन लाख ९३ हजार ८७९ हेक्टर क्षेत्रावरील पिकांचाच विमा उतरविला आहे. सुमारे ५० टक्के क्षेत्राचा विमा काढणे अद्याप बाकी आहे. त्यामुळे पीकविम्याची मुदत वाढवून द्यावी, अशी मागणी होत आहे.

नैसर्गिक आपत्ती, कधी ओला तर कधी कोरडा दुष्काळ, तर कधी गारपीट आदींमुळे शेतमालाचे मोठ्या प्रमाणात नुकसान होते. ऐन काढणीच्या वेळी पाऊस येतो आणि पिके नष्ट होतात. याचा फटका शेतकरी बांधवांचा बसतो. त्यामुळे केंद्र सरकारने शेतकऱ्यांसाठी एक रुपयात पीकविमा योजना काढली आहे. त्याअनुषंगाने १५ जूनपासून विमा उतरविण्यास सुरुवात झाली आहे.

यंदा मृग नक्षत्राने दगा दिल्याने पेरण्या उशिरा झाल्या. त्यामुळे बहुतांश शेतकऱ्यांना विमा काढणे शक्य झाले नाही. पावसाने जुलैत चांगलाच जोर धरला. त्यामुळे शेतकऱ्यांनी पेरण्या आटोपल्या. त्यांना शेतातील कामामुळे पीकविमा काढणे शक्य झाले नाही. जिल्ह्यात यंदा आठ लाख ८० हजार हेक्टरवर खरीप हंगामाचे नियोजन आहे. प्रत्यक्षात जिल्ह्यात चार लाख ३९१ शेतकऱ्यांनी तीन लाख ९३ हजार ८७९ हेक्टरवरील क्षेत्राचा वीमा काढला आहे. तर आणखी ५० टक्क्यांहून अधिक शेतकऱ्यांनी पीकविमा काढलाच नाही.

विशेष म्हणजे पीकविमा भरण्यासाठी आता केवळ चार दिवस उरले आहेत. १५ जुलै रोजी विमा भरण्याची मुदत संपणार आहे. आता उर्वरित पाच दिवसांत ५० टक्के क्षेत्रावरील विमा काढावा लागणार आहे.