Kharif Crop Insurance : साडेसहा लाख अर्जदारांनी भरला खरिपात पीकविमा

Nanded News : खरीप पीकविमा योजनेत आजपर्यंत जिल्ह्यातील सहा लाख ५१ हजार ७८९ अर्जदार शेतकऱ्यांनी सहभाग घेतला आहे. यात चार लाख १९ हजार ८६३ हेक्टर क्षेत्र विमा संरक्षित केले आहे.

शेतकऱ्यांनी प्रति अर्ज एक रुपया या प्रमाणे सहा लाख ५१ हजार ७८९ रुपये, तर केंद्र व राज्य सरकारकडून ३८२ कोटी रुपये विमा कंपनीकडे जमा होणार आहे. विमा भरण्यासाठी पाच दिवस शिल्लक असल्यामुळे सर्व पात्र शेतकऱ्‍यांनी विमा योजनेत सहभागी होण्याचे आवाहन जिल्हा प्रशासनाने केले आहे.

नांदेड जिल्ह्यात खरीप हंगामात युनायटेड इंडिया जनरल इन्शुरन्स कंपनीद्वारे पंतप्रधान खरीप पीकविमा योजना राबविण्यात येत आहे. या योजनेअंतर्गत ज्वारी, सोयाबीन, कापूस, तूर, उडीद व मूग या पिकांसाठी पीकविमा भरण्यात येत आहे. यात सहभागी होण्याची अंतिम तारीख १५ जुलै २०२४ आहे.

या योजनेत सर्व पात्र शेतकऱ्यांनी सहभागी व्हावे, असे आवाहन जिल्हाधिकारी अभिजित राऊत यांच्यासह जिल्हा अधीक्षक कृषी अधिकारी भाऊसाहेब बऱ्हाटे यांनी केले. सहा लाख ५१ हजार ७८९ अर्जदार शेतकऱ्यांनी सहा पिकांसाठी विमा भरला आहे. यात शेतकऱ्यांनी चार लाख १९ हजार ८६३.७९ हेक्टर क्षेत्र विमा संरक्षित केले आहे.

यासाठी शेतकऱ्यांनी सहा लाख ५१ हजार ७८५ विमा हप्ता भरला. तर केंद्राचा १६५ कोटी व राज्य शासनाचा २१६ कोटी असा एकूण ३८२ कोटी ३४ लाखांचा विमा हप्ता कंपनीकडे जमा होईल. विमा योजनेत सहभागी होण्यासाठी आणखी पाच दिवस शिल्लक आहेत. शेतकऱ्यां‍नी सहभागी व्हावे, असे आवाहन बऱ्हाटे यांनी केले.