Mumbai News : कुर्ला दूध डेअरी, बोरिवलीतील पशुसंवर्धन विभागाच्या जागेचे हस्तांतर केल्यानंतर आता धाराशिव येथील एक एकर दूध शीतकरण केंद्राची जागा महसूल विभागाकडे हस्तांतरित करण्याचा निर्णय घेण्यात आला आहे.

महसूल तथा पशुसंवर्धन व दुग्धविकासमंत्री राधाकृष्ण विखे पाटील यांनी सूत्रे स्वीकारल्यानंतर दुग्धविकास व पशुसंवर्धन विभागाच्या जागा हस्तांतरित करून महसूल विभागाकडे घेण्याचा सपाटा लावला आहे. कुर्ला येथील तब्बल २० हजार कोटींची जमीन अदानी समूहाला देण्यात आली आहे. ही जागा नाममात्र दरात देण्यात आली आहे. कुर्ला दूध डेअरीतील कामकाज सध्या ठप्प असल्याचे सांगत सरकार या व्यवसायातून बाहेर पडण्याचा विचार करत असल्याचे सरकार दुग्ध व्यवसायातून बाहेर पडत असल्याचे सांगत आहे. त्यामुळेच या जागांचा बाजार केला जात आहे.

काही दिवसांपूर्वी पशुवैद्यकीय महाविद्यालयाची बोरिवली येथील तीन एकर जागा मुंबै बँकेच्या सहकार भवनाच्या बांधकामासाठी देण्याचा शासन आदेश पशुसंवर्धन विभागाने काढला होता. मात्र हा आदेश संकेतस्थळावरून काढून टाकावा, यासाठी मंत्री कार्यालयातून यंत्रणा हलली आणि तो आदेश संकेतस्थळावरून हटवला. मात्र मुंबई आणि मुंबई उपनगरातील कोणताही भूखंड हस्तांतरित करण्याचे अधिकार मुख्यमंत्र्यांना असतात. त्यामुळे या फाइलवर सही न होताच भूखंड हस्तांतरित केल्याचे समजते.

आदेश काढण्याची घाई

भूखंड हस्तांतरित न होताच त्याचा शासन आदेश काढण्याची घाई पशुसंवर्धन व दुग्धविकास विभागाला लागली होती. यानंतर आता धाराशिव येथील दुग्ध व्यवसाय विभागाच्या अखत्यारित असलेल्या शासकीय दूध शीतकरण केंद्रांची एक एकर जागा साहित्य सम्राट अण्णा भाऊ साठे यांच्या पुतळ्यासाठी द्यावी,

अशी मागणी धाराशिव जिल्हाधिकाऱ्यांनी २३ मे २०२३ रोजी, तर दुग्ध व्यवसाय विभागाच्या आयुक्तांनी ३० जुलै रोजी केली होती. त्यावर तातडीने कार्यवाही करत ही जागा हस्तांतरित करण्याचा निर्णय घेतला गेला आहे. ही जागा तातडीने महसूल विभागाकडे हस्तांतरित करावी, असे आदेशही काढले आहेत.