Pune News: शेतकऱ्यांच्या पशुधनाला थेट गोठ्यातच उपचार मिळावेत यासाठी फिरत्या पशुचिकित्सालयाद्वारे पशुसेवा मिळणार आहे. यासाठी मुख्यमंत्री स्वास्थ्य योजनेअंतर्गत ३२९ फिरती पशू चिकित्सालये (ॲम्ब्युलन्स) मंजूर केली आहेत. त्यापैकी ८० चिकित्सालये प्रत्यक्ष कार्यरत असल्याची माहिती पशुसंवर्धन आयुक्त डॉ. प्रवीणकुमार देवरे यांनी दिली.

डॉ. देवरे म्हणाले, की मुख्यमंत्री १०० दिवसांच्या कार्यक्रमांतर्गत पशुधनाच्या स्वास्थ्यावर विशेष लक्ष केंद्रित केले होते. पशुधन निरोगी असेल, तर शेतकरीदेखील निश्‍चित असतो. शेतकरी आणि पशुपालकांना पशुधनावर उपचार करण्यासाठी प्रवास करावा लागू नये, किंवा पशुधनाची वाहतूक करावी लागू नये यासाठी फिरती चिकित्सालये सुरू करण्यात आली आहेत. पशुधन आजारी पडल्यावर वाहतुकीसाठी मोठा खर्च ग्रामीण भागातील पशुपालकांना करावा लागतो.

हा खर्च, वेळ आणि मनस्ताप कमी होण्यासाठी ही योजना राबवली जात आहे. या चिकित्सालयामध्ये अत्याधुनिक यंत्रणा, औषधोपचारांची साधने आणि दोन पशुवैद्यकीय अधिकारी आणि तंत्रज्ञांचा समावेश असतो. यासाठी १९६२ या टोल फ्री (निःशुल्क) क्रमांकाची देखील व्यवस्था केली आहे.

शेतकऱ्यांनी त्यांच्या पशुधनाच्या आजाराची माहिती या क्रमांकावर नोंदविल्यावर थेट शेतकऱ्यांच्या गोठ्यावर उपचारासाठी हे वाहन जात आहे. सध्या ३२९ फिरती चिकित्सालये मंजूर असून, ८० कार्यान्वित आहेत.