Solapur News : मध्य रेल्वेकडे सोलापूर जिल्ह्यातील सांगोला-मंगळवेढा-सोलापूर या नविन रेल्वेच्या सर्वेक्षणाची शिफारस करण्यात आली आहे. या मार्गामुळे जीआय मानांकन असलेल्या डाळिंबाचे अर्थकारण भक्कम होण्यास मदत होणार आहे.

सोलापूर जिल्ह्यात सांगोला-मंगळवेढा-सोलापूर या नविन रेल्वेचा प्रस्ताव खासदार जयसिद्धेश्वर महास्वामी यांनी मांडला. सुरवातीला २०२२ मध्ये लोकसभा अधिवेशनात या नव्या रेल्वेची मागणी केली गेली. त्यानंतर मध्य रेल्वेच्या लोकप्रतिनिधी व सल्लागार समितीच्या बैठकीत काही दिवसांपूर्वी या मागणीवर पाठपुरावा करण्यात आला.

याच बैठकीत सोलापूर विभागीय रेल्वे समितीचे अध्यक्षपद खा. डॉ. महास्वामी यांच्याकडे आले. त्यामुळे आगामी काळातील विभागीय समित्यांचे अध्यक्षपद त्यांच्याकडे असेल. मध्य रेल्वेच्या सर्व प्रमुख प्रस्तावात या नव्या रेल्वेचा प्रस्ताव अत्यंत महत्त्वाचा ठरणार आहे.

अर्थकारण भक्कम करणारा प्रस्ताव

सांगोला तालुका सोलापूर जिल्हास्थानापासून मोठ्या अंतरावर असलेला भाग आहे. पण सांगोल्याचे अर्थकारण मोठ्या प्रमाणात बदलत आहे. एकेकाळी दुष्काळी तालुका म्हणून ओळख असलेला सांगोला आता डाळिंब निर्मितीचे आगार बनला आहे. मागील काही वर्षात किसान रेलचा प्रयोग केला गेला.

तेव्हा सांगोल्यातून सर्वाधिक डाळिंबाची वाहतूक देशातील इतर बाजारपेठांमध्ये किसान रेलद्वारे झाली. यावरून सांगोल्याला रेल्वे कनेक्टिव्हिटी मिळाली तर तेथील अर्थकारण मजबूत होऊ शकते हे सिद्ध झाले. यातून आगामी काळात सांगोल्याची शेती त्यामुळे अधिक समृध्द होऊ शकते.

मंगळवेढ्याची साथ मोलाची

रेल्वेच्या प्रस्तावित मार्गावरील मंगळवेढा हे महत्त्वाचे शहर या मार्गाशी जोडलेले आहे. मंगळवेढ्याला सध्या रेल्वे स्थानक नाही. त्यामुळे या प्रस्तावाने हे सांस्कृतिक शहर रेल्वेसोबत जोडले जाईल. तसेच जिल्हा केंद्र असलेल्या सोलापूरला येण्यासाठी हा मार्ग अधिक उपयुक्त ठरणार आहे.

मिरजकडून येणाऱ्या प्रवाशांना सध्या लांब अंतराने प्रवास करावा लागतो ते अंतर कमी होण्यास मदत होणार आहे. मागील वर्षी आमदार समाधान आवताडे यांनी या मार्गाची मागणी केंद्राकडे केली होती.