Kolhapur News: कोल्हापूर जिल्हा सहकारी दूध उत्पादक संघाच्या (गोकुळ) अध्यक्षपदी नविद मुश्रीफ यांची शुक्रवारी (ता. ३०) संचालक मंडळाच्या बैठकीत एकमताने निवड झाली. ‘गोकुळ’चे ते पंधरावे अध्यक्ष असून वैद्यकीय शिक्षणमंत्री हसन मुश्रीफ यांचे चिरंजीव आहेत.

गोकुळ शिरगाव येथील संघाच्या प्रधान कार्यालयातील क्लॉलिटी कंट्रोल हॉलमध्ये दुपारी सर्व संचालकांची बैठक झाली. येथे ज्येष्ठ संचालक विश्‍वास पाटील यांनी नेत्यांनी जिल्हा बॅंकेत बंद केलेला लखोटा खुला केला.

त्यानंतर कार्यकर्त्यांनी नविद मुश्रीफांच्या नावाच्या घोषणा दिल्या. यानंतर दुपारी तीन वाजता प्रशासकीय पद्धतीने एकमताने नविद मुश्रीफ यांची निवड झाली. ज्येष्ठ संचालक माजी अध्यक्ष विश्‍वास पाटील आणि अरुण डोंगळे यांच्या मार्गदर्शनाखाली मी कार्यरत राहणार असल्याचे त्यांनी निवडीनंतर सांगितले.

माजी अध्यक्ष अरुण डोंगळे यांनी पंधरा दिवसांपूर्वी राजीनामा देणार नसल्याचे जाहीर करून जिल्ह्याचे राजकारण ढवळून काढले. ‘गोकुळ’च्या अध्यक्षाचे नाव मुंबईतून ठरेल आणि नूतन अध्यक्ष महायुतीचा असेल अशी भूमिका त्यांनी घेतली.

त्यानंतरही स्थानिक नेते मंत्री मुश्रीफ आणि आमदार सतेज पाटील यांनी संचालकांच्या बैठक घेऊन शशिकांत पाटील चुयेकर यांच्या नावाला पसंती दिली. मात्र त्या बैठकीत नेत्यांकडून नाराजी व्यक्त झाली.

अखेर मुंबईतून किल्ल्या फिरल्या आणि थेट गुरुवारी जिल्हा बॅंकेत जिल्ह्यातील नेत्यांच्या उपस्थितीत अध्यक्षांचे नाव लखोटा बंद केले. त्यानंतर रात्री उशिरा हे नाव नविद मुश्रीफ असल्याचे कागल मधील कार्यकर्त्यांनी स्टेट्स ठेवून जाहीर केले. शुक्रवारी दुपारी याच नावावर ‘गोकुळ’च्या प्रधान कार्यालयात शिक्कामोर्तब झाले.