आंबा

Indian Agriculture : सध्याच्या स्थितीत लवकर येणाऱ्या आंबा फळांची तोडणी झालेली आहे. मधल्या टप्प्यातील आंबा फळांची तोडणी सुरू आहे. मेअखेर पर्यंत काही ठिकाणी आंबा फळांची तोडणी सुरू राहणार आहे.

वाढलेल्या तापमानामुळे काढणी होत असलेल्या फळांमध्ये साका होण्याची शक्यता आहे. सध्याच्या काळात दिवस मोठा असल्याने काढणी सकाळी लवकर किंवा सायंकाळी उशिरा करावी. जेणेकरून हवामानातील उष्णतेपासून या फळांचे संरक्षण होईल.

काढणीनंतर फळातील उष्णता कमी करण्यासाठी प्रयत्न करावेत.फळे सावलीत ठेवावी.फळांची काढणी केल्यानंतर उन्हामध्ये वाहतूक करू नये.

सध्याच्या काळात उशिरा फळे येणाऱ्या बागांमध्ये अति तापमानाचा परिणाम होऊन फळगळ होण्याची शक्यता असते. अशा बागांमध्ये पाणी देण्याचे नियोजन करावे. तसेच १ टक्का पोटॅशिअम नायट्रेटची एक फवारणी करावी. यामुळे फळगळीवर नियंत्रण मिळेल.

नारळ

उन्हाळ्याच्या कालावधीत नारळामध्ये फुलोरा येण्याचे प्रमाण अधिक असते. या काळात झाडाला पाण्याचा ताण पडू देऊ नये.

नारळाला ठिबक सिंचनाने पाणी देण्याचे नियोजन करावे. यामुळे जमिनीत ओलावा टिकून राहण्यास मदत होते.

खोडाभोवती ३० सेंमी अंतर सोडून आळ्यामध्ये नारळाची सोडणे, गवत, पालापाचोळ्याचे आच्छादन करावे.

सुपारी

वाढलेल्या तापमानामुळे सुपारीची फळगळ होण्याची शक्यता आहे. हे लक्षात घेऊन झाडांना पाण्याचा ताण पडणार नाही, याची काळजी घ्यावी.

डॉ. पराग हळदणकर, ९४२१८०९७२१

(संचालक, विस्तार शिक्षण, डॉ. बाळासाहेब सावंत कोकण कृषी विद्यापीठ, दापोली,

जि. रत्नागिरी)