Ratnagiri News : थ्रिप्सच्या प्रादुर्भावामुळे हापूस आंबा अडचणीत आलेला असताना दोन दिवसानंतर अचानक गुरुवारपासून (ता. ८) पारा ३२ ते ३४ अंश सेल्सिअसवर जात असल्यामुळे फळे भाजण्याची भीती व्यक्त केली आहे. काही ठिकाणी उष्णतेचा परिणाम होत असल्याचे आंबा बागायतदारांकडून सांगण्यात आले.
यंदा पावसाने विश्रांती घेतल्यानंतर ऑक्टोबर महिन्यात उन्हाचा ताप पडला. परिणामी, जिल्ह्यात ठिकठिकाणी आंबा बागायतींमध्ये झाडांची पालवी जून झाली. त्यानंतर पहिल्या टप्प्यातील मोहोर झाडावर दिसू लागला.
या मोहोरातील उत्पादन मिळू लागले असून, फळे बाजारात दाखल झाली आहेत. दुसऱ्या टप्प्यातील मोहोर अवकाळी पावसाच्या तडाख्यात सापडला. त्यावर कीडरोगांचा प्रादुर्भाव झाला.
तिसऱ्या टप्प्यात आलेल्या मोहोरावर वेळीच औषध फवारणी केल्यामुळे त्यामधून एप्रिलच्या दुसऱ्या आठवड्यात मिळणार आहे. त्यानंतरचा मोहोर थ्रिप्सच्या प्रादुर्भावामुळे काळा पडलेला आहे. त्यामधून उत्पादन मिळणे अशक्य असल्याचे बागायतदारांचे मत आहे. मागील आठवड्यात जिल्ह्यात पोषक वातावरण होते. थंडीही चांगल्याप्रकारे पडलेली होती.
पारा २९ अंशावर होता; मात्र वातावरणात बदल झाला असून, पारा ३४ अंश सेल्सिअसवर गेला आहे. अचानक वाढ झाल्यामुळे दुपारच्या सुमारास उन्हाची तीव्रता जाणवत आहे. त्यामुळे काही आंबा बागायतीमधील तयार झालेल्या फळांवर उन्हाचा स्ट्रोक बसण्याची भीती व्यक्त केली जात आहे. तसे झाले तर मार्च महिन्यात हाती येणाऱ्या उत्पादनाला फटका बसण्याची शक्यता आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.