Mumbai News: क्रांतिसूर्य महात्मा जोतिराव फुले आणि क्रांतिज्योती सावित्रीबाई फुले यांना मरणोत्तर ‘भारतरत्न’ पुरस्काराने सन्मानित करण्याचा ठराव विधानसभेत सोमवारी (ता. २४) एकमताने करण्यात आला.

राजशिष्टाचारमंत्री जयकुमार रावल यांनी यासंदर्भात प्रस्ताव मांडला. ते म्हणाले, भारतरत्न हा देशाचा सर्वोच्च नागरी पुरस्कार आहे. एखाद्या क्षेत्रात असाधारण आणि सर्वोच्च कामगिरी केल्याबद्दल हा पुरस्कार देण्यात येतो.

राजकारण, कला, साहित्य, विज्ञान क्षेत्रातील नामवंतांना पुरस्काराने गौरविण्यात येते; क्रांतिसूर्य महात्मा जोतिराव फुले आणि क्रांतिज्योती सावित्रीबाई फुले यांनी उपेक्षित, वंचितांच्या जीवनात समृद्धीचा प्रकाश निर्माण करत, सामाजिक न्यायासाठी आयुष्य खर्ची घालून, अस्पृश्यता निवारण आणि स्त्री शिक्षणासाठी संघर्ष केला आहे.

त्यामुळे क्रांतिसूर्य महात्मा जोतिराव फुले आणि क्रांतिज्योती सावित्रीबाई फुले यांना ‘भारतरत्न’ या सर्वोच्च पुरस्काराने मरणोत्तर सन्मानित करण्यात यावे, असा प्रस्ताव मांडला. हा प्रस्ताव एकमताने मंजूर करण्यात आला.