Jalgaon News: खानदेशात बीटीमधील बोलगार्ड २ कापूस बियाणे विक्रीला यंदा कमी मिळाला आहे. यामुळे बियाणे विक्रीअभावी पडून राहिले. अनेक नामांकित कंपन्यांना कापूस बियाणे परत मागवावे लागले आहेत. 

यंदा कापूस बियाण्यांचा पुरवठा कंपन्यांकडून वेगात झाला. पण अपेक्षेपेक्षा १० ते १२ पाकिटांची कमी विक्री खानदेशात झाली आहे. सुमारे ४० लाख पाकिटे दाखल झाली होती. जळगावात सुमारे १८ लाख पाकिटांची विक्री झाली आहे. सुमारे सात ते आठ लाख कापूस बियाणे पाकिटे जिल्ह्यातून परत पाठवावी लागली.

अवैध कापूस बियाण्यांचीदेखील विक्री वाढली, यामुळे  बोलगार्ड २ प्रकारच्या कापूस बियाणे पाकिटांची विक्री कमी झाली आहे. सरळ वाणांचा पुरवठा मात्र कमी राहिला. त्याचा पुरवठा खानदेशात जूनच्या मध्यानंतर झाला. यामुळे अनेकांना सरळ वाणांची लागवड करणे शक्य झालेले नाही. काहींनी नाइलाजाने काळ्या बाजारातून सरळ वाण घेवून त्याची लागवड केली. 

सरळ वाणांची मागणी खानदेशात सुमारे चार ते पाच लाख पाकिटांची आहे. पण पुरवठा अल्प झाला. केळी उत्पादक पट्ट्यात या सरळ वाणांची मागणी अधिक असते. त्याचा काळाबाजारही तुटवड्यामुळे काही भागात सुरू झाला होता. जामनेर, रावेर, धुळ्यातील शिरपूर या भागांत जादा दरात सरळ वाणांची विक्री यंदाही झाली आहे.

काही शेतकऱ्यांनी १ जूनपूर्वीच अवैध कापूस बियाण्याची खरेदी जळगाव जिल्ह्यात विविध भागात ओळखीपाळखीच्या भागातून  केली. जळगाव जिल्ह्यात पाच लाख ६६ हजार हेक्टरवर कापूस लागवड २०२२ मध्ये झाली होती. नंतर लागवड सतत कमी झाली. यंदाची लागवड मागील हंगामाच्या तुलनेत एक लाख २० हजार हेक्टरने कमी झाली. याचाही फटका कापूस बियाणे विक्रीवर झाला आहे.

मागील किंवा २०२४ मध्ये जळगाव जिल्ह्यात कापूस लागवड पाच लाख ११ हजार हेक्टरवर झाली होती. खानदेशात पूर्वहंगामी कापूस पिकही सुमारे दोन लाख हेक्टरवर आहे. जळगाव जिल्ह्यात सुमारे दीड लाख हेक्टरवर पूर्वहंगामी कापूस पीक आहे. पण अवैध बियाणे विक्रीमुळे विविध कापूस बियाणे पुरवठादार कंपन्यांचेदेखील नुकसान झाले आहे, अशी माहिती मिळाली.