Cotton Seed Shortage : शेतकरी अडकला कृत्रिम टंचाईच्या चक्रव्यूहात

Amaravati News : कापूस पेरणीची वेळ आली की दरवर्षी एका विशिष्ट कंपनीच्या कापूस बियाण्यांचा तुटवडा मोठ्या प्रमाणात निर्माण होतो. मागील वर्षीसुद्धा अशाच तुटवड्याला शेतकरी त्रासला होता. त्यामुळे मिळेल ते बियाणे घेऊन शेती पेरली. मात्र उत्पन्नात कमालीची घट आली.

त्यामुळे शेतकऱ्यांना या चक्रव्युहातून काढून कंपनीने मुबलक बियाणे उपलब्ध करून देण्याची गरज आहे. दर्यापूर तालुका विशेषतः कोरडवाहू क्षेत्रात येत असल्यामुळे या भागात विशिष्ट कापूस वाणाचे बियाणे जमिनीत तग धरते.

त्यामुळे दर्यापूर तालुक्यात एका विशिष्ट कंपनीच्या बियाण्यांची मोठ्या प्रमाणात मागणी आहे, असे असताना दर्यापुरात दरवर्षी नियमितपणे या कापूस बियाण्याचा तुटवडा निर्माण केला जातो व काही वेळानंतर नफेखोरी वाढवून बियाणे उपलब्ध करून दिले जाते. हा धंदा दरवर्षीचा झाल्यामुळे शेतकरी मोठ्या प्रमाणात त्रासले आहेत.

पेरणीचे दिवस जवळ आले की शेतकरी दररोज आपले काम सोडून बियाणे मिळेल का, या आशेने कृषी केंद्रावर चकरा मारत असतो. मात्र दररोज आल्या पावली परत जावे लागत असल्याने त्रासलेला शेतकरी अखेर कृषी विभागामध्ये यासंबंधात विचारपूस करतो.