Latur News: माता, पिता व ज्येष्ठ नागरिक यांचा निर्वाह व कल्याण अधिनियम २००७ नुसार उतार वयात वडिलांचा सांभाळ न करणाऱ्या मुलाला निलंगा (जि. लातूर) येथील उपविभागीय अधिकारी शरद झाडके यांनी चांगलीच अद्दल घडवली.

शेडोळ (ता. निलंगा) येथील शेतकऱ्याची त्याच्या घरी जाऊन सर्वांची बाजू ऐकून घेतली. त्यानंतर सांभाळ करतो म्हणून मुलाने ताब्यात घेतलेली जमीन झाडके यांनी परत वडीलाच्या ताब्यात दिली. सांभाळ करण्याच्या हमीवर ही जमीन दुसऱ्या मुलाला कसण्यासाठी देत त्यांचा सांभाळ करून औषधोपचाराचा खर्च द्यावा, असे आदेशही त्यांनी दुसऱ्या मुलाला दिले.

कार्यालयात सुनावणी न घेता झाडके यांनी पहिल्यांदाच ज्येष्ठ नागरिकाच्या घरी जाऊन निर्णय दिला. ज्येष्ठ नागरिकांची उतारवयात हेळसांड होऊ नये म्हणून सरकारने ज्येष्ठ नागरिक कायदा मंजूर केला आहे. या कायद्यानुसार ज्येष्ठ नागरिकांना त्यांच्या मुलांकडून पोटगी मिळविण्याचा अधिकार आहे.

सांभाळ करण्याची हमी देऊन मुलांनी आईवडिलांची मालमत्ता स्वतःच्या नावावर करून घेतली असल्यास हे हस्तांतर कायद्यानुसार रद्द करता येते. कायद्यानुसार तातडीने दिलासा मिळण्यासाठी सरकारने उपविभागीय अधिकाऱ्यांची पीठासीन अधिकारी म्हणून नियुक्ती केली आहे.

या अधिकाऱ्यांकडे दाद मागताच ते तातडीने सुनावणी घेऊन निर्णय देतात. सर्वच प्रकरणात उपविभागीय अधिकारी तक्रारदार ज्येष्ठ नागरिक व त्यांच्या मुलांना कार्यालयातच बोलावून सुनावणी घेत निर्णय देतात.

निलंग्याचे उपविभागीय अधिकारी झाडके यांनी मात्र कार्यालयीन सुनावणीची ही औपचारिकता बाजूला ठेवत शेडोळ येथील शेतकरी माधव गणपती धुमाळ (वय ७८) यांच्या घरी जाऊन त्यांना दिलासा दिला. धुमाळ यांच्या तक्रारीनुसार झाडके यांनी त्यांच्या दोन्ही मुलांना नोटीस काढून सुनावणीला बोलावले होते.

मात्र थोरला मुलगा उपस्थित राहिला नाही. सोमवारी (ता. ९) घरी जाऊन झाडके यांनी प्रकरणात मार्ग काढला. या वेळी मंडल अधिकारी निळकंठ जाधव, तलाठी माधव बिराजदार, गंगाराम सूर्यवंशी, काकासाहेब दळवी, पोलिस एस. ए. पाटील, उपसरपंच स्वरूप धुमाळ, तंटामुक्ती अध्यक्ष शंकर धुमाळ, चंद्रकांत पाटील उपस्थित होते.

जमीन थोरल्याकडून धाकट्याकडे

घरी जाण्यापूर्वी उपविभागीय अधिकारी झाडके यांनी पोलिस, तंटामुक्त समितीचे अध्यक्ष, धुमाळ, त्यांची मुले या सर्वांना नोटीस दिली होती. त्यानुसार धुमाळ यांच्या घरासमोर झाडके यांनी सर्वांची बाजू ऐकून घेतली. धुमाळ यांच्या नावावर ९२ गुंठे जमीन आहे. यातील ५२ गुंठे जमीन त्यांनी दोन्ही मुलांना वाटणी करून दिली, तर स्वतःच्या नावावर ४० गुंठे जमीन ठेवली.

थोरला मुलगा रमेशने सांभाळ करून जमिनीतील अर्धे उत्पन्न देतो, या अटीवर वडिलांच्या नावावरील जमीन कसली. दोन्ही हंगामांत उत्पन्न काढले. परंतु काहीच दिले नाही व सांभाळही केला नाही, अशी तक्रार माधव यांची होती. त्यावर काहीच उत्पन्न निघाले नसल्याचे रमेशने सांगितले.

लहान मुलगा गणपत बाहेरगावी होता. त्याने भ्रमणध्वनीवरून वडिलांचा सांभाळ करण्याचे आश्‍वासन दिले. त्यानंतर ही जमीन माधव धुमाळ यांच्या सूचनेनुसार गणपतला देऊन त्याला वडिलांचा सांभाळ करण्यासह खर्चासाठी रोख रक्कमही देण्याचे आदेश झाडके यांनी दिले.