Akola News : वर्षानुवर्षे खरिपात घेतली जाणारी मूग, तीळ, ज्वारी ही पिके आता उन्हाळ्यात घेतली जाऊ लागली आहेत. या वर्षी अकोला जिल्ह्यात या पिकांचे क्षेत्र वाढलेले दिसत आहे. आतापर्यंत पिकांची स्थितीसुद्धा चांगली असल्याने उत्पादनाची अपेक्षा शेतकरी लावून बसलेले आहेत.

खरीप हंगामात घेतले जाणारे मूग, तीळ ही पिके गेल्या काही वर्षात कीड रोग, पावसाच्या तडाख्यात सापडत आहेत. यामुळे या पिकांचे लागवड क्षेत्र सातत्याने घटत चालले. याला पर्याय म्हणून शेतकरी आता मोठ्या प्रमाणावर या पिकांची उन्हाळी हंगामात लागवड करू लागले आहेत. भुईमुगापेक्षा पीक कमी कालावधीचे असल्याने तसेच कमी पाण्यात येत असल्याने या पिकाचे उन्हाळी हंगामातील क्षेत्र वाढत आहे.

यासाठी कृषी विभागाच्या (आत्मा) यंत्रणेमार्फत गेल्या तीन ते चार वर्षांपासून शेतकऱ्यांना पीक प्रात्यक्षिक व मार्गदर्शनही केले जात आहे. उन्हाळी मूग पिकाचे क्षेत्र वाढत असून त्यापासून शेतकऱ्यांना चांगला दरही मिळतो आहे.

यंदा उन्हाळी हंगामात मोठा बदल दिसत आहे. उन्हाळी ज्वारीचे क्षेत्र दोन हजार एकरापेक्षा जास्त झालेले आहे. उन्हाळी तीळसुद्धा पाचशे एकर, तर मुगाची सहाशे ते सातशे एकरापर्यंत लागवड पोहोचली आहे. ही नवी पीकपद्धती चांगल्यापैकी रुजते आहे. विशेषत: अकोला तालुक्यात कानशिवणी, येळवण, सोनाळा, निपाणा, बोरगाव (मंजू), सुकळी(नंदापूर) गावात मूग लागवड आहे.