Solapur News : शेतीशी निगडित घटकांबाबत जगात वेळोवेळी होत असलेले बदल, विकसित होत असलेले तंत्रज्ञान हे शेतकऱ्यांपर्यंत त्यांच्या गरजेनुरूप योग्यवेळी पोहोचविणे आणि त्यासाठी आवश्यक साह्य व सोईसुविधा पुरविणे निकडीचे आहे. त्यानुसार सन २०२५-२६ मध्ये राज्यातील शेतकऱ्यांचे देशाबाहेरील अभ्यास दौऱ्याचे आयोजन कृषी विभागाने केले आहे.

या योजनेअंतर्गत युरोप- नेदरलँड, जर्मनी, फ्रांस, स्वित्झर्लंड, इस्राईल, जपान, व्हिएतनाम, मलेशिया फिलिपिन्स, चीन, द. कोरिया, इत्यादी संभाव्य देशाची निवड करण्यात आली आहे. या दौऱ्याकरिता इच्छुक शेतकऱ्यांनी ३१ जुलै २०२५ पर्यंत अर्ज सादर करावेत, असे आवाहन करण्यात आले आहे.

या दौऱ्यात शेतकऱ्यांच्या निवडीसाठी निकष ठरवण्यात आले आहेत. या अभ्यास दौऱ्याकरिता जाणारा लाभार्थी हा स्वत: शेतकरी असावा, स्वतःच्या नावे चालू कालावधीचा सात-बारा व आठ-अ उतारा असणे आवश्यक आहे.

शेतकऱ्यांचे उत्पन्नाचे मुख्य साधन शेती असावे, असे त्याने स्वयंघोषणापत्रात नमूद करावे. (प्रपत्र-२) शेतकऱ्यांचे अॅग्रीस्टॅक अंतर्गत फार्मर आयडी असणे आवश्यक आहे. शेतकरी कुटुंबामधून फक्त एकाच व्यक्तीला या योजनेचा लाभ घेता येईल. शेतकरी शारीरिकदृष्ट्या तंदुरुस्त असणे बंधनकारक आहे.

यासाठी सदर योजनेत सहभागी होण्यास अर्ज सादर करताना शारीरिकदृष्ट्या तंदुरुस्त असल्याबाबतचे वैद्यकीय प्रमाणपत्र (किमान एम.बी. बी. एस. डॉक्टरचे सादर करावे). शेतकरी वैध पारपत्रधारक (पासपोर्ट) असावा. पुराव्यासाठी पारपत्राची मुदत /वैधता दर्शविणाऱ्या पानाची झेरॉक्स प्रत जोडावी, पारपत्राची वैध मुदत दौरा निघण्यापूर्वी किमान तीन महिनेपेक्षा जास्त असावी. या अहवालानुसार शेतक-यास कोणत्याही प्रकारच्या संसर्गजन्य रोगाची लागण झाली नसल्याचे तसेच सलग ७-१० दिवस कालावधीचा परदेश दौरा करण्यास शेतकरी शारीरिकदृष्ट्या पात्र असल्याचे डॉक्टरांनी प्रमाणित करणे आवश्यक आहे.

५० टक्के खर्च मिळणार

शासनाकडून अभ्यास दौऱ्याकरिता सर्व घटकातील (संवर्गातील) शेतकऱ्यांना एकूण खर्चाच्या ५० टक्के रक्कम किंवा जास्तीत जास्त एक लाख यापैकी कमी असेल ती रक्कम अनुदान म्हणून देण्यात येणार आहे.

सदर दौऱ्याकरिता जिल्ह्यातील ५ शेतकऱ्यांना संधी मिळणार आहे. त्यात एक महिला शेतकरी, एक केंद्र व राज्यस्तरावरील विविध कृषी पुरस्कार प्राप्त व पीक स्पर्धा विजेते शेतकऱ्याची निवड करणे अनिवार्य आहे. लक्ष्यांक मर्यादेपेक्षा जास्त अर्ज प्राप्त झाल्यास जिल्हास्तरावर सोडत काढून ज्येष्ठता क्रमवारीनुसार शेतकऱ्याची निवड केली जाईल.

जिल्ह्याची सोडत ४ ऑगस्टला

सोलापूर जिल्ह्यातून या अभ्यास दौऱ्यासाठी अर्ज केलेल्या शेतकऱ्यांची सोडत ४ ऑगस्टला जिल्हा अधीक्षक कृषी अधिकारी कार्यालय, सोलापूर येथे दुपारी २ वाजता काढण्या येणार आहे, या ठिकाणी या शेतकऱ्यांनी उपस्थित राहावे, असे आवाहन जिल्हा अधीक्षक कृषी अधिकारी शुक्राचार्य भोसले यांनी केले आहे.