Turbhe News : तीन वर्षांपासून सतत वाढत असलेले लसणाचे भाव आता पूर्वपदावर आले आहेत. त्यामुळे लसणाची फोडणी सर्वांनाच परवडणार आहे. घाऊक बाजारात ५० ते १२० रुपये; तर किरकोळ बाजारात १०० ते २०० रुपये किलोने लसणाची विक्री होत आहे.

लसणाचे सर्वसाधारण भाव हे ५० ते १०० आणि १०० ते १५० रुपये किलो असेच असतात; मात्र तीन वर्षांपूर्वीपासून हे भाव सातत्याने वाढत होते. मुळात लसणाची लागवड कमी झाल्याने आवक कमी झाली होती; मात्र बाजारात लसणाला मोठी मागणी असल्याने, मागणीइतका पुरवठा होत नव्हता.

त्यामुळे मागणी-पुरवठ्याचे गणित बिघडले आणि भाव वाढायला सुरुवात झाली. २०० रुपये किलोपासून हे भाव वाढत ४०० रुपयपर्यंत पोहोचले होते. त्यामुळे भाजीसह इतर पदार्थांना लसणाची फोडणी देणे सर्वसामान्यांना परवडत नव्हते. एक किलो लसूण घेणाऱ्यांना १०० ग्रॅम लसणावरच भागवावे लागत होते.

आता फेब्रुवारीपासून बाजारात नव्या लसणाची आवक सुरू झाली आहे. चांगला भाव मिळत असल्याने गेल्या वर्षी अनेक शेतकऱ्यांनी मोठ्या प्रमाणात लसणाची लागवड केली. त्यामुळे आता बाजारात मागणीपेक्षाही दुप्पट लसूण उपलब्ध आहे आणि त्यामुळेच भाव खाली आले आहेत. मार्च महिन्यात चांगल्या प्रतीचा लसूण १२० रुपये; तर आकाराने लहान व ओला लसूण ५० रुपये किलो झाला आहे.

टेम्पोमधून ठिकठिकाणी विक्री होणारा लसूण १०० रुपयाला दीड किलो मिळत आहे. अवकाळी पावसाचा वारंवार फटका बसून लागवडीखालील क्षेत्र घटल्‍याने मध्यंतरी लसणाचे भाव वाढले होते. फेब्रुवारी अखेरीस लसणाची आवक वाढल्‍याने एपीएमसी बाजारात दर कमी झाले. त्‍यामुळे किरकोळ दरही नियंत्रणात आहेत.