Purandar News : दिवाळीनंतर फुल उत्पादकांचा महत्त्वाचा हंगाम असणाऱ्या मार्गशीर्षमधील लक्ष्मी पूजेसाठीच्या फुलांना चांगला दर मिळावा अशी आशा असते. मात्र, आता आज पहिल्याच गुरुवारी फुलांचे बाजारभाव कोसळल्याने ही अपेक्षा पूर्णतः मावळली आहे. बाजारात मोठी उलाढाल करणाऱ्या व महत्त्वाचे फूल मानले जाणारे झेंडू, शेवंतीवर्गीय फुल उत्पादक शेतकऱ्यांना कमी दराचा फटका बसला. या मुळे मार्गशीर्षमधील लक्ष्मी फुल उत्पादकांवरती रुसल्याचे चित्र बाजारात पाहावयास मिळाले.

मार्गशीर्षनिमित्त गुरुवारी होणाऱ्या लक्ष्मीच्या पूजेसाठी फुलांची मोठ्या प्रमाणावरती मागणी असल्याने फुल उत्पादकांसाठी मार्गशीर्ष महिना हा दसरा, दिवाळी प्रमाणेच महत्त्वाचा हंगाम असतो. या महिन्यातील आज पहिला गुरुवार असल्याने बाजारभाव चांगल्या प्रकारचे होतील असे फुल उत्पादकांना अपेक्षित होते.

मात्र मागील पाच-सहा दिवसांपासून थंडीचे प्रमाण अत्यंत कमी झालेल्याने बाजारात फुलांची आवक ही मोठ्या प्रमाणात वाढल्याने कालपासूनच सर्वच फुलांच्या बाजारभाव वरती याचा मोठा परिणाम झाला. आज पुणे येथील गुलटेकडी बाजारात शेवंतीवर्गीय पौर्णिमा फुले, शंका व्हाईट या फुलांची मोठी आवक पाहावयास मिळाली. त्याचप्रमाणे झेंडूच्या फुलांची देखील मोठी आवक मागील काही दिवसांपासून होत असल्याने झेंडू फुलांचे बाजारभाव देखील मातीमोल किमतीत आज बाजारात पाहावयास मिळाले.

पोर्णिमा पांढरी व पिवळी शेवंती आज बाजारामध्ये वीस रुपयांपासून ५० रुपये प्रति किलो एवढ्या कमी दराने विकली गेली. तर झेंडूची फुले दहा ते वीस रुपये एवढ्या कमी दराने विकली गेली. मोठ्या प्रमाणात झेंडूची फुले आज न खपता तशीच पडून होती. झेंडू उत्पादकांचा तोडणी व बाजारात विक्रीसाठी आणण्याचा वाहतूक खर्च देखील यामुळे निघत नसल्याचे चित्र बाजारात पाहावयास मिळाले. बाजारात कापरी, बिजली ही फुले देखील ५० रुपयांच्या आसपास विकली गेली. तर फक्त अस्टर फुले अत्यंत कमी प्रमाणात आवक असल्याने ७० ते ८० रुपये किलोपर्यंत विकली गेली.