Pune News : घोडेगाव (ता. आंबेगाव) परिसरातील जनावरांमध्ये ‘लम्पी स्कीन’सदृश लक्षणे आढळून आली आहेत. यामुळे शेतकऱ्यांमध्ये भीतीचे वातावरण पसरले आहे. दुष्काळाचे सावट असताना आता लम्पी स्कीन आजाराचे नवे संकट शेतकऱ्यांपुढे उभे ठाकले आहे.

घोडेगाव परिसरातील गावांमध्ये दुग्ध व्यवसाय मोठ्या प्रमाणात आहे. सध्या पसरत असलेल्या आजाराचा थेट दूध उत्पादनावर परिणाम होत आहे. लम्पी स्कीनमुळे जनावरांच्या शरीराला गाठी येतात. पुढे त्या गाठींचा आकार मोठा होतो.

हा आजार जास्त वेगाने दुसऱ्या जनावरांमध्ये संक्रमित होत असून, त्याच्या लक्षणांमध्ये प्रथम जनावरांना ताप येतो, त्यांचे वजन कमी होते. जनावरांच्या डोळ्यातून चिकट पाणी टपकते. तोंडातून लाळ पडते, शरीरावर छोट्या गाठी येतात. यामुळे जनावरे अधिक आजारी पडतात.

घोडेगाव परिसरातील भवानी माळ, जायझुरी, परांडा, पानमळा, भगतवाडी येथील जनावरे लम्पी स्कीनच्या प्रादुर्भावाने बाधित झाली आहेत. ग्रामस्थांनी सांगितलेल्या माहितीनुसार, संदीप काळे, नीलेश काळे, मनीष काळे, गोविंद काळे आदी शेतकऱ्यांची जनावरे लम्पीने बाधित झाली आहेत. संबंधित ठिकाणी व आजूबाजूच्या वाड्या-वस्त्यांवर लसीकरण न झाल्यास या आजाराची लागण मोठ्या प्रमाणात वाढण्याची शक्यता निर्माण झाली असल्याचे शेतकऱ्यांनी सांगितले.