Lumpy Skin : पशुधनाच्या जीवावर उठलेला ‘लम्पी’ येतोय आटोक्यात

Solapur News : राज्यातील गायवर्गीय पशुधनाच्या जीवावर उठलेला लम्पी स्कीन आजार आटोक्यात येत असून, राज्यात आतापर्यंत बाधित झालेल्या एकूण १ लाख ३८ हजार ८०९ जनावरांपैकी १ लाख १८ हजार ५२२ जनावरे बरी झाली आहेत. सध्या केवळ १० हजार ६८४ जनावरे बाधित असून, त्यांच्यावर उपचार सुरू आहेत. तीही आता धोक्याबाहेर आहेत. त्यामुळे पशुपालकांना काहीसा दिलासा मिळाला आहे.

राज्यातील जवळपास २८ जिल्ह्यांतील २८७ तालुक्यांत लम्पीने पाय पसरवले आहेत. पशुसंवर्धन विभागाने आतापर्यंत लम्पीला प्रतिबंध करणाऱ्या डोसच्या मात्रा जनावरांना दिल्या आहेत. तसेच वेळीच उपचार होत आहेत. त्यामुळे जनावरे बाधित होण्याचे प्रमाण कमी-कमी होत आहे.

गेल्यावर्षी बाधित जनावरांची संख्या तब्बल ४ लाख ८० हजारांपर्यंत होती. पण यंदा मार्चपासून ही संख्या केवळ १ लाख ३८ हजारापर्यंत खाली आली आहे. त्यापैकीही जवळपास ९०-९२ टक्केपर्यंत जनावरे उपचाराने बरी झाली आहेत. पूर्वी प्रतिदिन जनावरांच्या मृत्यूचे प्रमाण ४०० पर्यंत होते, ते गेल्या काही महिन्यात १२५ वर आले, आता तर ते फक्त २० ते ३० पर्यंत खाली आले आहे.

लम्पीवर नियंत्रणासाठी प्रत्येक जिल्ह्यात अगदी तालुकास्तरापर्यंत जनावरांच्या उपचारासाठी ३०८८ इपिसेंटर्स (संसर्ग केंद्रे) उघडण्यात आली आहेत. त्याशिवाय लसीकरणाची मोहीमही वेगाने सुरू आहे. राज्यात एकूण १ कोटी ३९ लाख ९२ हजार ३०४ गायवर्गीय जनावरे आहेत.

त्यापैकी १ कोटी ३९ लाख १० हजार ८१० जनावरांचे लसीकरण आतापर्यंत पूर्ण झाले आहे. परंतु मधल्या काळात पावसाळ्याच्या तोंडावर पुन्हा एकदा लम्पीने डोके वर काढल्याने पशुपालकांची चिंता वाढली. पण आता मात्र परिस्थिती काहीशी नियंत्रणात असल्याचे सांगण्यात आले.

बाधितांची संख्या ओसरली

राज्यात सध्या जळगावला -४२३ बाधित आहेत. तर नगर- ७४९, धुळे-११२, अकोला-१४, पुणे-१२४, लातूर- ६४२, छत्रपती संभाजीनगर-३१८, बीड- ५४५, सातारा- ४९, बुलडाणा- ५, अमरावती- ४३, धाराशिव- ३६९, कोल्हापूर-३११, सांगली- ७००, यवतमाळ- ६०६, परभणी- ४३०, सोलापूर- ७०७, वाशीम- ३१७, नाशिक- ८५३, जालना- ३४०, नांदेड- ३९३, नागपूर- ४६३, चंद्रपूर- ८, हिंगोली- ५७०, नंदुरबार- ४९७, वर्धा- ३५७, रत्नागिरी- ६४१, सिंधुदुर्ग-९८ अशा २८ जिल्ह्यात १० हजार ६८४ जनावरे बाधित आहेत. काही ठरावीक जिल्हे वगळता इतरठिकाणी बाधित जनावरांची संख्या कमी-कमी होत आहे.