ॲग्रोवन वृत्तसेवा

Akola News : अकोला ः निसर्गाची अवकृपा, कमी झालेले पीक उत्पादन, हमीभावापेक्षा कमी मिळालेला बाजारभाव, वाढलेला उत्पादन खर्च यामुळे शेती तोट्यात येऊन परिणामी शेतकरी कर्जबाजारी झाला. वेळेत कर्ज न भरल्यामुळे थकबाकीचे प्रमाण वाढले आहे.

सरकारने कर्जमाफीचे आश्‍वासन देऊनही ते पाळले जात नाही, या मुद्यांकडे लक्ष वेधण्यासाठी मूर्तिजापूर तालुक्यातील शेतकरी एक मे रोजी अन्नत्याग आंदोलन करतील, असा इशारा देण्यात आला. या बाबत शेतकऱ्यांनी उपविभागीय अधिकाऱ्यांकडे निवेदन दिले.

निवेदनात म्हटले, की मुख्यमंत्र्यांनी सातबारा कोरा करण्याचे आश्वासन निवडणुकीपूर्वी जाहीर सभांतून शेतकऱ्यांना दिले होते. परंतु त्याची पूर्तता अर्थसंकल्पात केल्या गेली नाही.  मूर्तिजापूर तालुक्यातील निंबा, हातगाव, जामठी या महसूल मंडळातील शेतकऱ्यांना अतिवृष्टीच्या मदतीतून वंचित केले असून, त्यांना ३० एप्रिलपर्यंत अतिवृष्टीची मदत द्यावी.

अन्यथा एक मे रोजी महाराष्ट्रदिनी राष्ट्रीय महामार्ग क्रमांक ५३ वर शेतकरी दुपारी बारा ते चार या वेळेत रणरणत्या उन्हात आंदोलन करतील, असा इशारा प्रगती शेतकरी मंडळ, स्वाभिमानी शेतकरी संघटना, भारतीय किसान संघ, जनमंच, न्यू यंग बॉइज क्लब फार्मर्स ग्रुप, यंग बॉइज क्लब यांच्या वतीने उपविभागीय अधिकारी संदीप अपार यांना देण्यात आला. 

या निवेदनावर राजू वानखडे, अरुण बोंडे, प्रा. सुधाकर गौरखडे, कैलास साबळे, राहुल राठी, अभी पोळकट, पंकज वानखडे, मुन्ना नाईकनवरे, नंदकिशोर बबानिया, विकी तिवारी, सुभाष मोरे, अनिल गावंडे, प्रीतम देशमुख, प्रा. श्रावण रणबावळे, प्रमोद खेडकर, मिलिंद वानखडे, जनार्दन धाये, संजय वानखडे, अजाबराव वाहिले, श्रीकांत वानखडे, गणेश गावंडे, रणजीत इंगोले, गोपाल बांबल, सेवकराम लहाने, अनिल राठोड, सुभाष महल्ले, संतोष रुद्रकार, निखिल खरबडकर, किसन लोडम, हरिदास फुके यांच्या स्वाक्षऱ्या आहेत.