Maharashtra news : राज्यातील सहकारी व खासगी दूध प्रकल्पांनी गाय दुधाचे खरेदी दर प्रतिलिटर एक ते दोन रुपयांनी कमी केले आहेत. मागणीच्या तुलनेत पुरवठा जादा असल्यामुळे दरात घसरण होत असल्याचा दावा डेअरी चालकांनी केला आहे.

डेअरी क्षेत्रातील जाणकारांच्या म्हणण्यानुसार, अनेक जिल्ह्यांत समाधानकारक पाऊस झालेला नाही. त्यामुळे खरीप पिकांच्या उत्पादनात घट येणार आहे. सणासुदीला दुधाचा पैसा सोडता शेतकऱ्यांकडे उत्पन्नाचे अन्य साधन नाही. पावसाअभावी चारा पिके देखील संकटात सापडतील व चाऱ्याची तीव्र टंचाई तयार होईल, एक अशी अटकळ होती. परंतु सध्या तरी तीव्र चाराटंचाई सदृश्य स्थिती नाही. शेवटच्या टप्प्यात झालेल्या पावसामुळे काही भागांमध्ये गाय दुधाचा पुरवठा कमी झालेला नाही. याउलट सणासुदीच्या तोंडावर दुधाला असलेली अपेक्षित मोठी मागणी अजूनही तयार झालेली नाही. त्यामुळे गाय दुधाच्या पुरवठा साखळीत सद्यःस्थितीत अडथळा आलेला नाही. बाजारात मागणीच्या तुलनेत गाईच्या तुलनेत जास्त झालेला आहे. परिणामी खरेदी दरात घसरण झालेली आहे.

पुणे जिल्हा सहकारी दूध (कात्रज) संघाने २१ ऑक्टोबरपासून गाय दुधाच्या खरेदी दरात प्रतिलिटर दीड रुपयाने कपात केली आहे. ‘‘आंतरराष्ट्रीय बाजारात दूध भुकटी व लोण्याचे दर कमी झालेले आहेत. यामुळे खाजगी डेअरी चालकांनी दुधाच्या खरेदी दरात काहीशी कपात केलेली आहे. परिणामी कात्रज संघाने खरेदी दरात प्रति लिटर दीड रुपया कपात केलेली आहे. शेतकऱ्यांकडून आता ३.५ व ८.५ श्रेणीतील दूध प्रतिलिटर ३० .५० रुपये (वरकड खर्चासह ३१.३० रुपये) दराप्रमाणे स्वीकारले जात आहे,’’ असे सूत्रांचे म्हणणे आहे.

बाजारात गाय दुधाची मागणी मर्यादित असतानाही कात्रज संघाकडून दूध स्वीकारणे चालूच आहे. शेतकऱ्यांचे अतिरिक्त दूध नाकारता येत नाही. हे दूध एरवीप्रमाणे भुकटी करण्याकडे वळविणे परवडत नाही. परिणामी कमी दरात खासगी डेअरी चालकांना या दुधाची विक्री करून विल्हेवाट लावली जात आहे. त्यामुळेच खरेदी दर कमी करण्यात आल्याचा युक्तिवाद केला जात आहे.