Akola News : स्थानिक अकोला-वाशीम जिल्हा मध्यवर्ती सहकारी बँकेला २०२३-२०२४ चा (कै.) वैकुंठभाई मेहता उत्कृष्ट जिल्हा मध्यवर्ती सहकारी बँक व सहकार क्षेत्रातील उल्लेखनीय कामगिरीसाठी बँकेचे अध्यक्ष डॉ. संतोषकुमार कोरपे यांना दि महाराष्ट्र स्टेट को-ऑप. बँक्स असोसिएशन लि., मुंबई यांच्याकडून राज्यस्तरीय (कै.) विष्णूअण्णा पाटील जीवन गौरव पुरस्कार देऊन गौरविण्यात आले.

हे दोन्ही पुरस्कार डॉ. संतोषकुमार कोरपे यांना बुधवारी (ता. २३) मुंबई येथे आयोजित एका भव्य कार्यक्रमात सहकार राज्यमंत्री डॉ. पंकज भोयर, बँक्स असोसिएशनचे अध्यक्ष सी.ए. भाऊ भगवंत कड व कोकण विभागाचे महसुल आयुक्त डॉ. विजय सूर्यवंशी, असोसिएशनचे उपाध्यक्ष प्रंचित पोरेड्डीवार या मान्यवरांच्या हस्ते प्रदान करण्यात आले.

तीन पिढ्यांपासून कोरपे परिवाराने जिल्ह्यासह राज्यातील सहकार चळवळ अधिक गतिमान केली असून, सहकाराच्या माध्यमातून ग्रामीण तसेच शहरी भागाचा आमूलाग्र विकास घडविण्यात मोठा वाटा राहिला आहे. याची दखल घेत डॉ. कोरपे यांना हा पुरस्कार देऊन सन्मानित करण्यात आले. डॉ. कोरपे यांच्या नेतृत्वात जिल्हा बँकेचे आज वटवृक्षात रूपांतर झाले आहे.

ही किमया अध्यक्ष डॉ. कोरपे यांनी सहजपणे करून दाखविल्यामुळे त्यांना एक नव्हे, दोन नव्हे तर तीन पुरस्कार जाहीर झाले आहेत. नुकतेच ‘नाबार्ड’नेसुद्धा त्याची दखल घेऊन उत्कृष्ट बँक म्हणून अकोला-वाशीम जिल्हा बँकेला सन्मानित केले आहे.

तरुण आणि महिलांनी पुढे यावे ः कोरपे

सहकाराला अधिक बळकटी आणण्याकरिता तरुणांनी तसेच महिलांनी पुढे येण्याची गरज आहे. तरुणांतून उद्योजक निर्माण झाले पाहिजे. महिलांनी देखील बँकेच्या आर्थिक मदतीने लघू उद्योग, कुटीरोद्योग, उभारावे, असे आवाहन पुरस्काराला उत्तर देताना डॉ. संतोषकुमार कोरपे म्हणाले.