Fruit Farming : निघोज, ता. पारनेर ः येत्या काळात ऊस, कांदा, फळपिकांचे योग्य पद्धतीने व्यवस्थापन करावे. यासाठी वाणांसह लागवड पद्धत, पाणी, कीड व्यवस्थापनावर भर द्यावा, असा सल्ला दहिगावने (ता. शेवगाव) येथील कृषी विज्ञान केंद्रातील कृषिविद्या विभागाचे विषय विशेषज्ञ नारायण निबे आणि उद्यानविद्या विभागाचे विषय विशेषज्ञ नंदकिशोर दहातोंडे यांनी दिला.

‘अॅग्रोवन’च्या वर्धापन दिनानिमित्त पारनेर तालुक्यातील राळेगण थेरपाळ येथे ‘अॅग्रोवन’ व ‘राळेगण थेरपाळ सेवा सहकारी सोसायटी’ यांच्या तर्फे कांदा, ऊस आणि सीताफळ या विषयावर चर्चासत्र झाले. दहिगावने (ता. शेवगाव) येथील कृषी विज्ञान केंद्रातील विषय विशेषज्ञ नारायण निबे व नंदकिशोर दहातोंडे, कन्हैया अॅग्रोचे व्यवस्थापकीय संचालक सुरेश पठारे, लोकनियुक्त सरपंच पंकज कारखिले, सेवा सहकारी सोसायटीचे अध्यक्ष दत्तात्रय कारखिले, उपाध्यक्ष संदीप डोमे, कृषी पर्यवेक्षक चंद्रकांत क्षीरसागर, कृषी सहायक साधना रासकर, पत्रकार मार्तंड बुचडे, ॲग्रोवनचे बातमीदार सूर्यकांत नेटके आदी उपस्थित होते.

नारायण निबे म्हणाले, की सध्या उसाची उत्पादकता प्रति एकरी ३५ ते ४० टन आहे. खोडव्याची परिस्थिती तर अधिक बिकट आहे. उसाचे उत्पादन घेताना जमिनीची निवड, लागवडीचे आंतर महत्त्वाचे आहे. फुटव्यांची संख्या वाढण्यासाठी चार ते सात फुटांपर्यंत रुंदीची सरी असावी. वेळेवर कीड, रोग नियंत्रण करावे. जमिनीचा सेंद्रिय कर्ब किमान एक टक्का असावा. शेणखताचा वापर करावा. ऊस लागवड करताना चांगल्या दर्जेदार व शिफारस केलेल्या वाणांची निवड करावी. व्यवस्थापन चांगले केले तर एकरी ९० टनांपेक्षाही अधिक उत्पादन निघू शकते. लागवडीसाठी  घरच्या घरी रोपे तयार करावीत. 

दर्जेदार कांदा उत्पादनाबाबत नंदकिशोर दहातोंडे म्हणाले, की योग्य जातींची निवड, बीज प्रक्रिया, रासायनिक खते, सूक्ष्म अन्नद्रव्यांचा संतुलित वापर, महत्वाचा आहे. मान बारीक, चवीला तिखट, टिकवण क्षमता अधिक असणारी जात निवडावी.

‘सकाळ’चे निघोज येथील बातमीदार अमोल खलारी यांनी सूत्रसंचालन करून ॲग्रोवनची भूमिका सांगितली. सरपंच पंकज कारखिले यांनी आभार मानले. या वेळी सोसायटीचे उपाध्यक्ष संदीप डोमे, कृषिभूषण बाळासाहेब कारखिले, तंटामुक्त समितीचे माजी अध्यक्ष पांडुरंग कारखिले, बाळकृष्ण कारखिले, राजेंद्र शितोळे, दिलीप देशमुख, नरेश सोनवणे, संभाजी आढाव, कानिफनाथ पठारे, राहुल पठारे, बाजीराव शेवकर, ॲग्रोवनचे सचिन तवले यांच्यासह हकिगतपूर, माजमपूर, गुणोरे, म्हसे, जवळे भागातील शेतकरी उपस्थित होते.