Milch Animal Sellection: दुधाळ जनावरांची निवड कशी करावी?

नविन जनावर विकत घेताना अनेक गोष्टींचा विचार करावा लागतो. यामध्ये आपल्या भागातील वातावरणात कोणत्या जातीचे जनावर राहू शकेल याचा आधी विचार करावा. जनावर खरेदी करताना पूर्व नोंदीवरून, बाह्य गुणावरून आणि प्रत्यक्ष पाहून गुणावैशिष्ट्यांवरुन दुधाळ जनावराची निवड करावी. जनावराचं वय तसच सरासरी उत्पादन क्षमता यावरून जनावरांची निवड करणं सोयीचं होतं. यासाठी मात्र जनावरांच्या नोंणी असणं आवश्यक आहे. जनवरांच्या बाह्य अंगावरुन जनावरांची उत्पादन क्षमता लक्षात येते. जनावरांची नोंद नसल्यास दुधाळ जनावरांच्या लक्षणावरून त्यांची निवड करता येते. जनावरांची छाती जर जास्त रुंद असेल तर रक्ताभिसरण ही जास्त होते म्हणजे असं जनावर शेतीकामासाठी सक्षम आहे असं समजावं. अशा गायींच दूध उत्पादनही चांगलं असतं. जनावराच्या मागील दोन पायातील अंतर जास्त असल्यास जनावराच्या कासेच्या वाढीसाठी भरपूर जागा मिळते. गर्भाशयाचा आकार वाढल्याने गर्भाची वाढ भरपूर होते आणि वासराच्या जन्माच्या वेळी वजन जास्त असते. त्यामुळे वासराच्या मरतुकीचं प्रमाणही कमी होतं. भाकड जनावर खरेदी करत असाल तर त्याच्या कासेवर कातडीच्या घड्या असाव्यात म्हणजे जनावर दुधावर असल्यास त्याची कास किती मोठी होऊ शकते याचा अंदाज येईल. दुधाळ जनावरांना खालच्या पोटाच्या बाजूने बघितल्यास एक मोठी शीर दिसते तिलाच दुधाची शीर म्हणतात. ही जितकी जाड व वळणावळणाची असेल तितके जनावर जास्त दूध देणारे समजावे. दुधाळ जनावरांना मागील दोन्ही पायाच्या बाजूने बघताना कासेचा त्रिकोणी भाग जितका ठळकपणे दोन्ही पायातून दिसेल तितके दुधाळ जनावर समजावे.