Kasa News : डहाणू तालुक्यात मोठ्या प्रमाणात मिरची उत्पादक शेतकरी आहेत. यात साधी मिरची व ढोबळी मिरचीचे उत्पादन मोठ्या प्रमाणात काढले जाते. आधुनिक तंत्रज्ञानाचा वापर करून ८०० हेक्टर साधी मिरची, तर २५० हेक्टर भोपळी मिरचीचे उत्पादन केले जाते.

भोपळी मिरची, विविध फुले यासाठी तर तंबू बांधले जातात. त्यावर शेतकरी मोठा खर्च करतात; पण सध्या वातावरण बदलामुळे अनेक बागातदारांवर संकट उभे ठाकले आहे. अनेक मिरची पिकांची वाढ खुंटत असल्याने शेतकरी त्रस्त आहेत.

डहाणू तालुक्यात सध्या मोठमोठे प्रकल्प सुरू आहेत. रेल्वे रुंदीकरण, बुलेट ट्रेन, बडोदरा एक्सप्रेस, वाढवण बंदर यांची कामे सुरू असून, मोठ्या प्रमाणात खोदकाम, बांधकामे केली जात आहेत. अवजड वाहनांची मोठी वर्दळ असते.

अनेक ठिकाणी बांधकामासाठी लागणारी खडी रेती, रेडीमिक्स काँक्रीट तयार करणारे प्लांट उभे टाकले आहेत. यातून मोठ्या प्रमाणात धूलिकरण हवेद्वारे बाहेर पडत आहेत. अनेक ठिकाणी गौण खनिजाचे मोठ्या प्रमाणात उत्खनन आणि वाहतूक होत आहे.

यामुळे येथील वातावरणात मोठा बदल झाला आहे. याचा परिणाम येथील पारंपरिक पिके, चिकू, मिरची, लीली फुले यांची वाढ खुंटत आहे. अनेक रोपांची वाढ खुंटल्यामुळे बागायतदार चिंतेत आहेत.