Vasai News : अवकाळी पावसाने शेतकऱ्यांच्या हातातोंडाशी आलेला घास हिरावून घेतला आहे. पेंढ्यासह लागवडीखाली असलेल्या पिकांची वाताहत झाली आहे. त्यामुळे महिन्याची मेहनत, पैसा वाया गेला. अशातच जे पीक उभे आहे,

त्यांच्यावरही पावसामुळे बुरशीजन्य रोगाची लागण होण्याची शक्यता वर्तवली जात आहे. त्यामुळे शेतकऱ्यांच्या चितेंत भर पडत आहे. मोठी हानी टाळण्यासाठी तत्काळ उपाययोजना करावी, अशा सूचना कृषी विभागाकडून करण्यात आल्या.

पालघर जिल्ह्यात विविध भाजीपाला पिकांची लागवड करण्यात आली आहे. शेकडो हेक्टरवर हे पीक घेण्यात आले आहे. मुंबई, ठाणे यासह आजूबाजूच्या जिल्ह्यात पालघर जिल्ह्यातील भाजीला मागणी असते. त्यामुळे अर्थार्जनाचा मार्ग शेतकऱ्यांना मिळतो. लागवडीसाठी महिनाभर शेतकरी काबाडकष्ट करतात.

मजुरांची वाढती मजुरी, बी-बियाण्यांची किंमत, तसेच देखभाल आदी खर्च केला जातो. यंदा अचानक पावसाने भातपीक, पेंढा, तसेच भाजीपाला लागवडीवर परिणाम झाला. जिल्ह्यात अनेक ठिकाणी पिकांची हानी झाल्यामुळे आर्थिक नुकसानीला सामोरे जावे लागणार. त्यातच ज्या पिकांचे नुकसान झाले नाही, अशा पिकांना भुरी रोग (पांढरी बुरशी), करपा रोगाची शक्यता वर्तविण्यात येत आहे.

शेतकरी हवालदिल

शेतकरी वर्गाला काही वर्षांपासून नैसर्गिक आपत्तींना तोंड द्यावे लागत आहे. बदलत्या हवामानाच्या सावटाखाली शेतकरी मेहनतीने पीक घेत असतात, मात्र अशा वातावरणामुळे बुरशीजन्य रोगांची लागण होऊन उत्पादन घटते. त्यामुळे शेतकरी हवालदिल होत आहेत.