Palghar News : पावसाला सुरुवात झाल्याने जिल्ह्यातील चिकू बागायतदार बागांच्या मशागती करण्यावर भर देत आहे. फळबागातदार नवीन फळझाडे लागवड करणे, जुन्या फळबागांच्या खतांचे नियोजन करून शिफारसीप्रमाणे खते देणे, मशागतीची कामे अशी अनेक कामांमध्ये मग्न आहे.
उत्तर कोकण विभागातील (पालघर जिल्हा) चिकूच्या कालीपत्ती या जातीपासून अधिक उत्पादन व नफा मिळवण्यासाठी पिकाला कृषी संशोधन केंद्राने शिफारस केल्याप्रमाणे चिकू बागांना खते देणे आवश्यक आहे, असे कृषी संशोधन केंद्राचे कीटकशास्त्रज्ञ डॉ. एल. के. गभाले यांनी सांगितले.
चिकू या फळपिकापासून अधिक उत्पादन मिळावे म्हणून जून महिन्यात पालवी अवस्था असताना २० टक्के नत्र, ४० टक्के स्फुरद आणि ३२ टक्के पालाशयुक्त खते द्यावीत. सप्टेंबर महिन्यात फळधारणेच्या अवस्थेमध्ये असताना २० टक्के नत्र आणि १६ टक्के पालाशयुक्त खते द्यावीत.
नोव्हेंबर महिन्यात फळे वाटाणा अवस्थेमध्ये असताना २० टक्के नत्र, ४० टक्के स्फुरद आणि १६ टक्के पालाशयुक्त खते द्यावीत. फेब्रुवारी महिन्यात फळवाढीच्या अवस्थेमध्ये २० टक्के नत्र आणि १६ टक्के पालाशयुक्त खते द्यावीत, अशी वर्गवारी करून खत मात्रा कोणत्या प्रमाणात असावी, याचे शेतकऱ्यांना नियोजन करून देण्यात आले आहे.
जिवाणू संवर्धकांचा वापर
जून महिन्यात १५ किलो गांडूळ खताबरोबर १०० ग्रॅम अझेटोबॅक्टर आणि १०० ग्रॅम स्फुरद विरघळविणारे जिवाणू प्रति झाड याप्रमाणे चरातून बांगडी पद्धतीने चिकूच्या फळबागेत वापर करावा, अशी शिफारस पालघरच्या कृषी संशोधन केंद्रामार्फत देण्यात आली आहे.
सूक्ष्म अन्नद्रव्यांची फवारणी
ऑक्टोबर महिन्यात झिंक सल्फेट ०.६%, लोह सल्फेट ०.४%, मॅंगनीज सल्फेट ०.२%, कॉपर सल्फेट ०.२% आणि बोरॅक्स ०.२% याप्रमाणे सूक्ष्म अन्नद्रव्यांची फवारणीसाठी कृषी संशोधन केंद्रामार्फत शिफारस केली आहे.
चिकूचे खत व्यवस्थापन
पहिल्या वर्षी प्रत्येक कलमास एक घमेले शेणखत, ३०० ग्रॅम युरिया, ९०० ग्रॅम सिंगल सुपर फॉस्फेट आणि ३०० ग्रॅम म्युरेट ऑफ पोटॅश दोन हप्त्यात समप्रमाणात विभागून द्यावे. पहिला टप्पा ऑगस्टमध्ये आणि दुसरा टप्पा जानेवारीमध्ये द्यावा. दुसऱ्या वर्षी पहिल्या वर्षाच्या मात्रेच्या दुप्पट; तिसऱ्या वर्षी तिप्पट याप्रमाणे २० वर्षापर्यंत वाढवीत जावे. त्यानंतर दरवर्षी २० घमेली शेणखत, ६ किलो युरिया, १८ किलो सिंगल सुपर फॉस्फेट आणि ६ किलो म्युरेट ऑफ पोटॅश ही खते चरातून बांगडी पद्धतीने प्रतिझाडास द्यावी.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.