Latur News : येथील उच्चतम कृषी उत्पन्न बाजार समितीच्या अडत बाजार मागील चौदा दिवसापासून पेमेंटच्या विषयावरून बंद आहे. खरेदीदारांनी शेतीमालाचे पेमेंट चोवीस तासात द्यावे, या भूमिकेवर तर परंपरेनुसार व्यापाऱ्यांनी पेमेंट घ्यावे, यावर खरेदीदारही ठाम आहे. दोघांचा वादात शेतकऱ्यांसह हमाल मापाड्यांची परवड सुरू होत आहे.

यात काहीच तोडगा निघत नसल्याने समितीने व्यापाऱ्यांना बाजार सुरू करण्याबाबत नोटिसा दिल्या. मात्र, त्यानंतरही शुक्रवारी (ता. १२) बाजारात सौदे निघाले नाहीत. आता सोमवारी (ता. १५) बाजार सुरू होण्याची आशा सर्वांना आहे.

खरेदीदारांनी अडत व्यापाऱ्यांकडून खरेदी केलेल्या शेतीमालाचे पैसे (पेमेंट) चोवीस तासात द्यावे, अशी मागणी व्यापाऱ्यांची आहे. यासाठी व्यापाऱ्यांनी बाजार समितीने काढलेल्या जुन्या परिपत्रकाचा आधार घेतला आहे.

तर अडत बाजारात अनेक वर्षापासून दहा दिवसात पेमेंट देण्याची परंपरा सुरू असून या परंपरेनुसारच व्यापाऱ्यांनी पेमेंट घ्यावे, अशी खरेदीदारांची भूमिका आहे. यावरून गेल्या काही महिन्यांत सातत्याने अडत बाजार बंद राहत आहे. यापूर्वी बाजार बंद झाल्यानंतर काही दिवसातच त्यावर तोडगा निघाला व बाजार पुर्ववत सुरू झाला.

या वेळेला मात्र, व्यापारी व खरेदीदारांनी विषय चांगलाच ताणून धरल्यामुळे चौदा दिवस उलटले तरी अजून बाजार सुरू झालेला नाही. यामुळे बाजारातील कोट्यवधी रूपयाची उलाढाल ठप्प झाली असून शेतकऱ्यांना शेतीमालाच्या विक्रीसाठी अन्य ठिकाणच्या बाजाराचा पर्याय शोधावा लागत आहे. यातूनच बाजारात शेतीमाल विक्रीसाठी घेऊन आलेल्यांना तो दुसरीकडे वाहतूक करून नेण्यासाठी अडचण झाली आहे.

यातच आता हमाल मापाडींचीही बाजार बंद असल्याने उपासमार सुरू झाली असून त्यांच्याकडूनही बाजार सुरू करण्याची मागणी होत आहे. बाजार सुरू न झाल्यास आंदोलनाचा इशारा हमाल मापाडी संघटनेने दिला आहे. यातच व्यापाऱ्यांनी चोवीस तासात पेमेंटच्या मागणीसाठी आंदोलन केले तर बाजार समितीच्या वतीने खरेदीदार व व्यापाऱ्यांच्या बैठका घेण्यात आल्या.

जिल्हा उपनिबंधकांनीही बैठकीला हजेरी लावून बाजार सुरू करण्यासाठी मध्यस्थी केली. मात्र, या सर्व प्रयत्नांना यश आले नाही. शेवटचा प्रयत्न म्हणून बाजार समितीने व्यापाऱ्यांना बाजार सुरू करून सौदे काढण्याबाबत नोटिसा दिल्या. त्यानंतरही शुक्रवारी बाजारात शेतीमालाचा सौदा निघाला नाही.

 सोमवारी बाजार सुरू होण्याची आशा

व्यापारी व खरेदीदार त्यांच्या भूमिकेवर आडून आहेत. समितीने नोटिसा दिल्यानंतर त्याबाबत व्यापारी व खरेदीदारांकडून अद्याप प्रतिसाद दिलेला नाही. बाजार समितीने दिलेल्या नोटिसा चुकीच्याच असल्याचे खरेदीदार संघटनेचे म्हणणे आहे.

व्यापारी व खरेदीदार स्वार्थापोटी शेतकऱ्यांच्या हिताकडे दुर्लक्ष करत आहेत. तर बाजार समितीकडूनही आक्रमक भूमिका घेतली जात नाही. या स्थितीत चोवीस तासात पेमेंटच्या आडून अडत बाजारातील बोटावर मोजता येणाऱ्या काही व्यक्ती राजकारण तर करत नाही ना? असा प्रश्न उपस्थित होत आहे.