Nashik News : नाशिक विभागात २०२३-२४ या वर्षात नाशिक, धुळे, नंदुरबार व जळगाव जिल्ह्यांत कमी प्रमाणात पर्जन्यमान झालेले आहे. त्यामुळे सद्यःस्थितील ओढे-नाल्यांमध्ये अल्प प्रमाणात पाणी उपलब्ध आहे.

पावसाळा संपल्याने ओढे-नाले यामधील वाहून जाणारे पाणी अडवून पिकांना संरक्षित सिंचन देणे, जनावरांना पिण्याचे पाणी उपलब्ध होण्यासाठी ७ हजार १०० वनराई बंधारे लोकसहभागातून बांधण्यात येत आहेत, अशी माहिती नाशिक विभागीय कृषी सहसंचालक मोहन वाघ यांनी दिली.

जून ते सप्टेंबर अखेरपर्यंत पावसाळी हंगाम संपल्यानंतर बऱ्याच कालावधीपर्यंत नाले व ओढ्यांमधून पाण्याचा प्रवाह चालू असतो. हा पाण्याचा प्रवाह पारंपरिक पद्धतीने अडवून पाण्याचा साठा करून बिगर पावसाळी हंगामातील पिकासाठी संरक्षित पाणी घेण्यासाठी ग्रामपातळीवर नियोजन गरजेचे आहे.

पाण्याची गरज काही अंशी भागविण्यासाठी उपलब्ध साधनसामुग्री जसे की, सिमेंट खतांची रिकामी पोती, माती, वाळू याचा वापर करून तात्पुरता बांध घालून वनराई बंधारे बांधण्यात येतात. त्यामुळे दुष्काळी परिस्थितीत काही अंशी दिलासा मिळतो.

पाण्याची टंचाई असणाऱ्या गावांची निवड करून तसेच ज्या गावात पाणलोट विकासाची कामे सुरू नाहीत, अशा गावांत वनराई बंधाऱ्यांची कामे मोठ्या प्रमाणावर घेतल्यास वर्षानुवर्षे पाणलोट विकास कार्यक्रमांपासून वंचित राहणाऱ्या गावांना पाणी टंचाईवर मात करण्यासाठी दिलासा मिळणार आहे.

२०२३-२४ मधील वनराई बंधारे व संरक्षित सिंचन स्थिती

जिल्हा वनराई बंधारे लक्ष्यांक बांधलेल्या वनराई बंधाऱ्यांची संख्या उपलब्ध सरासरी पाणीसाठा (टीएमसी) सिंचनाखाली आलेले सरासरी क्षेत्र (हेक्टर) उत्पादनात झालेली

अंदाजित वाढ (लाख रुपये)

नािक ३,१०० ९९६ १९९.२ १,९९२ ४९८

धुळे १,००० १२८ २५.६ २५६ ६४

नंदुरबार १,४०० १,१९८ २३९.६ २,३९६ ५९९

जळगाव १,६०० १६६ ३३.२ ३३२ ८३

एकूण ७,१०० २,४८८ ४९७.६ ४,९७६ १,२४४