Wanrai Bunds : अमरावती विभागात पूर्णत्वास आले २९०४ वनराई बंधारे

Amravati News : वनराई बंधाऱ्याच्या माध्यमातून पाणी साठवण क्षमतेत वाढीसोबतच पिकाच्या एका पाण्याची सोय करण्याचे उद्दिष्ट साधले जात आहे. अमरावती विभागात आतापर्यंत तब्बल २९०४ वनराई बंधारे बांधण्यात आले असून त्यामध्ये सर्वाधिक १३२५ बंधारे पूर्ण करीत यवतमाळ जिल्ह्याने आघाडी घेतली आहे.

शेतालगत वाहणारे नाले, ओढे यातील पाणी वाहून जात असल्याने त्याचा काहीही उपयोग होत नाही. त्यामुळे पाणी साठवून राहावे याकरिता वनराई बंधाऱ्यांचा प्रयोग केला जात आहे. अमरावती विभागात सहसंचालक किसन मुळे यांनी त्यासाठी पुढाकार घेतला आहे.

अमरावती विभागात अकोला, वाशीम, बुलडाणा, यवतमाळ, अमरावती अशा पाच जिल्ह्यांचा समावेश होतो. या सर्वच जिल्ह्यांना वनराई बंधाऱ्यांसाठी प्रोत्साहित केले जात आहे. या उपक्रमात लोकसहभागही वाढता असल्याचे सांगण्यात आले.

त्यामुळेच आतापर्यंत विभागातील पाच जिल्ह्यात तब्बल २९०४ वनराई बंधारे पूर्णत्वास गेले आहेत. त्यामध्ये बुलडाणा जिल्ह्यात ३९६, अकोला ३४५, वाशीम २८८, अमरावती ५५० तर यवतमाळ जिल्ह्यातील १३२५ वनराई बंधाऱ्यांचा समावेश आहे.