Pune News: राज्यातील पशुधनाची अचूक माहिती संकलित व्हावी आणि याद्वारे पशुपालनाचे धोरण तयार करण्यासाठी होत असलेली पशुगणना अंतिम टप्प्यात आली आहे. राज्यभरात झालेल्या पशुगणनेची आकडेवारी केंद्र सरकारला सादर करण्यात आली आहे. या आकेवारीची पडताळणी पूर्ण झाल्यानंतर केंद्र सरकार लवकरच ही माहिती जाहीर करणार असल्याचे पशुसंवर्धन विभागातून सांगण्यात आले.

राज्यात ॲपद्वारे संगणकीय २१ व्या पशुगणनेला २५ नोव्हेंबर रोजी प्रारंभ झाला. ही गणना ३१ मार्चअखेर संपविण्यात आल्याचा दावा पशुसंवर्धन विभागाने केला आहे. ही गणना ५१ हजार ७५८ गावांमधील वाड्या-वस्त्यांवर करण्यात आली. यासाठी ९ हजार प्रगणक आणि पर्यवेक्षकांची नियुक्ती करण्यात आली होती. या गणनेमध्ये विविध १६ प्रकारच्या पशुधन आणि विविध कुक्कुटादी पक्षी यांची जात, वय लिंगनिहाय आकडेवारीचे संकलन करण्यात आले आहे.

२० व्या पशुगणनेनुसार राज्यात ३ कोटी ३० लाख ८० हजार पशुधन होते. या पशुगणनेत १९ व्या पशुगणनेनुसार १.९३ टक्के वाढ झाली होती. आता २१ व्या पशुगणेनुसार त्यात वाढ झाली की घट हे लवकरच केंद्र सरकार जाहीर करणार आहे. या पशुगणनेनुसार प्रत्येक राज्याचे पशुपालनाचे धोरण आणि योजना आखल्या जाणार असल्याचे पशुसंवर्धन विभागातील सूत्रांनी सांगितले.

पशुधनात महाराष्ट्र सातव्या क्रमांकावर

२० व्या पशुगणनेनुसार देशात महाराष्‍ट्र सातव्या क्रमांकावर आहे. तर कुक्कुटमध्ये पाचव्या स्थानावर आहे. आता २१ व्या पशुगणनेत महाराष्ट्राचे स्थान अव्वल राहील की घटेल, हे समजणार आहे.

या पशुधनाची झाली गणना

पशुधनामध्ये गाय, म्हैस, शेळी, मेंढी, वराह, गाढव, घोडे, शिंगरे, खेचरे, हत्ती, उंट, श्‍वान, ससे, कुक्कुट व कुक्कुटादी पक्षी, यामध्ये कोंबड्या, बदके, टर्की, क्वेल, शहामृग, गिनी, इमू, हंस याबरोबरच भटकी कुत्री आणि गायींचा समावेश आहे.