Nagar News : राज्यात खरीप हंगामातील पिकांच्या उत्पादन वाढीसाठी गेल्यावर्षी केलेल्या कार्यवाहीमुळे फायदा झाल्याचे दिसून आले. त्यामुळे यंदाही खरिपातील पिकांची उत्पादन वाढ व्हावी, या साठी पेरणीपासून काढणीपर्यंत शेतकऱ्यांनी काय नियोजन करावे, याविषयी कृषी विभागाने नियोजन केले आहे. राज्यात सर्वाधिक क्षेत्र असलेल्या तूर, मूग, उडीद, भात, सोयाबीन, कापसाच्या पिकांवर अधिक भर असेल.

कृषी विभाग प्रामुख्याने तुरीमधील मग रोग, हेक्टरी रोपांची संख्या वाढीसाठी पेरणी नियोजन, ४५ दिवसानंतर शेंडे खुडणी, फूलकळी, फुलोरा व दाणे भरण्याच्या वेळी पाणी व्यवस्थापन, मूग व उडदामध्ये बुरशीजन्य रोगांपासून नियंत्रण, मूग, उडीद व तूर यांचे आंतरपीक, ज्वारी व मूग, कापसात मूग, उडदाचे आंतरपीक, भातामध्ये करपा, उदबत्ता, आभासमय काजळी रोगांचे नियंत्रण,

गादीवाफ्यावर भात रोपवाटिका व्यवस्थापन, चारसूत्री पद्धत, ड्रमसीडर, एसआरटी, मातीपरिक्षणानुसार खताचा वापर, खाचरात २ ते १० पाणी पातळी राखणे, खोडकिडे, तपकिरी तुडतुडे, पाने गुंडाळणारी आळी यांचे एकात्मिक व्यवस्थापन, सोयाबीनमध्ये उगवण क्षमता तपासणी,

बीबीएफ यंत्राद्वारे पेरणी, पाने खाणारी आळी, खोडमाशी व चक्री भुंगे नियंत्रण, नत्राचा अतिरिक्त वापर नको, कापसात जमिनीनुसार वाण निवड, हलक्या जमिनीत सरळ वाणांची अतीघन लागवड, एकात्मिक अन्नद्रव्य व्यवस्थापन, गुलाबी बोंड अळीचे नियंत्रण, स्वच्छ कापूस वेचणी, एक गाव एक वाण निवड आदी बाबींवर मार्गदर्शन करणार आहे. विस्तार विभागाने याबाबत जिल्हा अधिक्षक कृषी अधिकारी कार्यालयाला कळविले आहे.

नियोजनातील प्रमुख बाबी...

- तूर, मूग, उडीद, भात, सोयाबीन, कापसाच्या सुधारित बियाण्यांचा वापर

- विविध रोगांपासून बचावाचे नियोजन

- बीजप्रक्रिया, आंतरपीक पद्धतीचा अवलंब

- मृद आरोग्यपत्रिकेनुसार रासायनिक खते व मुलद्रव्यांचा संतुलित वापर

- तण व्यवस्थापन, पर्यावरण पूरक औषधांचा वापर

- क्रॉपसॅप अंतर्गत शेतीशाळा

- संरक्षित सिंचनासाठी ठिबक व तुषार सिंचनाचा अवलंब

खरिपात त्या-त्या भागात जी प्रमुख पीक आहेत. त्यांच्या उत्पादनात वाढ व्हावी, यासाठी कृषी विभागाकडून शेतकऱ्यांना पेरणीपासून काढणीपर्यंत मार्गदर्शन केले जाईल. खते, बियाणे व औषधांसह अन्य बाबींच्या वापरातून उत्पादन वाढविणे शक्य आहे.

- सुधाकर बोराळे, जिल्हा अधिक्षक कृषी अधिकारी, नगर.