Uddhav Thackeray: निवडणुका घेताच कशासाठी? व्हीव्हीपॅट मशीन काढल्यावरून उध्दव ठाकरेंचा संतप्त सवाल

Pune: स्थानिक स्वराज्य संस्थांच्या निवडणुकांमध्ये ईव्हीएमविषयी आधीच संभ्रम आहे. आता व्हीव्हीपॅट मशिन्सही काढली जात आहेत. मग निवडणुका घेण्याचा हा फार्स कशासाठी? थेट सांगा की आमचे इतके उमेदवार जिंकले. बटण दाबलं की दिवा लागतो, रिसीट दिसते, पण मत नोंदवलं जातंय की नाही, हे कळत नाही. त्यासाठी व्हीव्हीपॅट मशीन आवश्यक आहे, असे उध्दव ठाकरे म्हणाले. 

शिवसेना (उद्धव बाळासाहेब ठाकरे) पक्षप्रमुख उद्धव ठाकरे तीन दिवसांच्या दिल्ली दौऱ्यावर असून ते या दौऱ्यात इंडिया आघाडीच्या बैठकीत सहभागी होणार आहेत. त्यांनी आज (ता.७) माध्यमांशी बोलताना निवडणूक आयोग, व्हीव्हीपॅट, ट्रम्प टॅरिफ, एनआरसी-सीएए, आणि उपराष्ट्रपतींच्या राजीनाम्यासारख्या राष्ट्रीय मुद्द्यांवरून केंद्र सरकारवर टीका केली. शिवसेना-मनसे युतीच्या चर्चांनाही त्यांनी पूर्णविराम दिला असून "आम्हाला तिसऱ्याची गरज नाही," असे स्पष्ट केले. ठाकरे यांनी उपमुख्यमंत्री एकनाथ शिंदे यांच्यावर "गद्दार" अशी टीका करत त्यांच्या दिल्ली दौऱ्यातही लक्ष्य केलं. 

शिवसेना-मनसे युतीच्या चर्चांना पूर्णविराम

गेल्या काही दिवसांपासून शिवसेना आणि महाराष्ट्र नवनिर्माण सेना (मनसे) यांच्यात युती होण्याच्या चर्चा जोरात सुरू होत्या. याबाबत विचारले असता उद्धव ठाकरे यांनी ठामपणे सांगितले, "आम्ही दोघे भाऊ (उद्धव आणि राज ठाकरे) समर्थ आहोत. आम्हाला जे काही करायचे आहे, ते आम्ही स्वतः करू. यात तिसऱ्याची गरज नाही." या विधानाने त्यांनी युतीच्या चर्चांना पूर्णविराम दिला आहे.

त्यांच्या या स्पष्टोक्तीमुळे शिवसेना आणि मनसे एकत्र येण्याच्या शक्यता कमी झाल्या आहेत.उपमुख्यमंत्री एकनाथ शिंदे हेही सध्या दिल्ली दौऱ्यावर असल्याच्या पार्श्वभूमीवर उद्धव ठाकरे यांनी त्यांच्यावर जोरदार हल्ला चढवला. "गद्दार हा गद्दारच असतो. त्यांच्या मताला मी किंमत देत नाही. ते त्यांच्या मालकांना भेटायला आले असतील, तर मला त्यावर काही बोलायचे नाही," असे प्रत्युत्तर ठाकरे यांनी दिले. 

निवडणूक आयोग आणि व्हीव्हीपॅटवर प्रश्नचिन्ह

उद्धव ठाकरे यांनी निवडणूक आयोगाच्या कामकाजावर आणि व्हीव्हीपॅट मशिन्सच्या वापराबाबत गंभीर आक्षेप नोंदवले. "स्थानिक स्वराज्य संस्थांच्या निवडणुकांमध्ये ईव्हीएमवर आधीच संभ्रम आहे. आता व्हीव्हीपॅट मशिन्सही काढली जात आहेत. मग निवडणुका घेण्याचा हा फार्स कशासाठी? थेट सांगा की आमचे इतके उमेदवार जिंकले," असे ते म्हणाले.

त्यांनी निवडणूक प्रक्रियेच्या पारदर्शकतेवर प्रश्न उपस्थित केले आणि बॅलेट पेपरच्या तुलनेत व्हीव्हीपॅटची विश्वासार्हता कमी असल्याचे मत व्यक्त केले. "बटण दाबलं की दिवा लागतो, रिसीट दिसते, पण मत नोंदवलं जातंय की नाही, हे कळत नाही," असे त्यांनी सांगितले.

अघोषित एनआरसी आणि सीएएचा मुद्दा

बिहारमधील मतदार याद्यांबाबत झालेल्या गोंधळावरही ठाकरे यांनी भाष्य केले. "मतदाराची ओळख त्याने स्वतः सिद्ध करावी, असे काहीतरी ठरले आहे. यामुळे देशात अघोषित एनआरसी लागू झालाय का, असा प्रश्न निर्माण होतो," असे ते म्हणाले. नागरिकत्व दुरुस्ती कायदा (सीएए) आणि राष्ट्रीय नागरिक नोंदणी (एनआरसी) यांच्याबाबत यापूर्वीही देशभरात आंदोलने झाली होती.

ठाकरे यांनी निवडणूक आयोगाला या प्रकरणी स्पष्टता देण्याची मागणी केली आहे, जेणेकरून जनतेच्या मनातील संभ्रम दूर होईल.उपराष्ट्रपतींच्या अचानक राजीनाम्याबाबतही उद्धव ठाकरे यांनी प्रश्न उपस्थित केले. "उपराष्ट्रपतींना तडकाफडकी राजीनामा का द्यावा लागला? राजीनामा दिल्यानंतर ते कुठे आहेत? यावर खुलेपणाने चर्चा व्हायला हवी," असे ते म्हणाले. त्यांनी या मुद्द्यावर सरकारने स्पष्टता आणावी, अशी मागणी केली आहे.

ट्रम्प टॅरिफ आणि परराष्ट्र धोरणावर टीका

अमेरिकेचे माजी राष्ट्राध्यक्ष डोनाल्ड ट्रम्प यांनी भारतावर लादलेल्या टॅरिफच्या मुद्द्यावरही ठाकरे यांनी केंद्र सरकारला धारेवर धरले. "ट्रम्प आपल्या देशाची आणि पंतप्रधानांची खिल्ली उडवत आहेत, पण आपण त्यांना एका शब्दानेही उत्तर देत नाही. या टॅरिफचा फटका सामान्य जनतेला बसणार आहे," असे ते म्हणाले. त्यांनी केंद्र सरकारच्या परराष्ट्र धोरणावरही टीका केली. "देशाला खंबीर पंतप्रधान, गृहमंत्री आणि परराष्ट्रमंत्र्यांची गरज आहे. सध्याचे पंतप्रधान आणि गृहमंत्री हे भाजपाचे प्रचारमंत्री आहेत, देशाचे नाहीत," असे ठाकरे म्हणाले.