Pune News : आग्या मधमशीविषयी लोकांच्या मनात अकारण गैरसमज व भीती आहे. मात्र या मधमाशीचे महत्त्व व उपयुक्तता याबाबत अधिकाधिक प्रसार करून ही भीती दूर करण्याची गरज तज्ज्ञांनी व्यक्त केली.
ज्येष्ठ मधमाशीपालन शास्त्रज्ञ कै. डी. बी. महिंद्रे यांच्या मूळ इंग्रजीतील व मराठी अनुवादित ‘आग्या मधमाश्‍यांचे सुलभ पालन व व्यवस्थापन’ पुस्तकाचे प्रकाशन शनिवारी (ता. २४) प्रत्यक्ष व ऑनलाइन पद्धतीने पुणे येथे झाले.
‘बायफ’ संस्थेचे सल्लागार- विश्‍वस्त गिरीश सोहनी यांच्या हस्ते व ‘ॲग्रोटेक पब्लिकेशन’चे प्रकाशक डॉ. वि. सु, बावसकर, ज्येष्ठ शास्त्रज्ञ डॉ. धनंजय वाखले, ज्येष्ठ संशोधक व पुस्तकाचे अनुवादक डॉ. क. कृ. क्षीरसागर, केंद्रीय मधमाशी संशोधन केंद्राचे सहायक संचालक सुनील पोखरे आदी उपस्थित होते. ‘इन्स्पायर्ड लाइफ’ संस्थेचे संस्थापक श्रीकांत सोमण ऑनलाइन उपस्थित होते.
श्री. सोहोनी म्हणाले, ‘‘आग्या मधमाश्‍या पाळीव नाहीत. परंतु योग्य पद्धतीने त्यांचे व्यवस्थापन करता येते. परागीभवनात त्यांचे कार्य महत्त्वाचे आहे. मात्र कीटकनाशकांच्या वापरामुळे त्यांचा नाश होत आहे.’’
डॉ. वाखले म्हणाले, ‘‘आग्या मधमाशीविषयी समाजात अनेक गैरसमज आहेत. शाळा, महाविद्यालये, शेतकरी आदींपर्यंत प्रशिक्षणे व अभ्यासक्रमाद्वारे या मधमाशीची उपयुक्तता व महत्त्व पटवून देणे गरजेचे आहे.’’ डॉ. क्षीरसागर व डॉ. बावसकर यांनीही मनोगत व्यक्त केले.
ज्योती भक्त म्हणाल्या, ‘‘इंग्रजी पुस्तकातील ज्ञान मराठी भाषेतून सर्वांपर्यंत पोहोचावे ही वडिलांची इच्छा होती. पुस्तकाच्या रूपाने ती पूर्ण झाल्याचे समाधान आहे.’’ रेवती सौदीकर यांनी सूत्रसंचालन केले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.