Sharad Pawar: ना टायर्ड हूं, ना रिटायर्ड... ; शरद पवारांचा पलटवार

Sharad Pawar vs Ajit Pawar : राष्ट्रवादीच्या फुटीनंतर अजित पवार यांनी राष्ट्रवादी काँग्रेस पक्षावर दावा केला आहे. तसेच अजित पवार यांच्यावर हल्ला चढवत तुमचे वय झाले आहे. कधी थांबणार आहात की नाही? , असा सवाल केला होता. त्याला आज शरद पवार यांनी प्रतित्तुर दिले.

पक्षफुटीनंतर शरद पवार यांनी राज्यव्यापी दौऱ्याला सुरुवात केली. आज ते नाशिकमध्ये पोहोचल्यानंतर पत्रकार परिषद घेतली. यावेळी यावेळी पवारांनी माजी पंतप्रधान अटलबिहारी वाजपेयींच्या शब्दांचा पुनरुच्चार करत पवार म्हणाले, 'मला निवृत्त व्हायला सांगणारे ते कोण आहेत? मी अजूनही काम करू शकतो. " ना टायर्ड हूं, ना रिटायर्ड... असे म्हटले. त्यानंतर शेजारी बसलेल्या अमोल कोल्हेंनी डायलाॅग पूर्ण करत 'मै फायर हू' म्हटल्यावर पवार खळळून हसले"

अजित पवार यांच्या नेतृत्वाखाली राष्ट्रवादीतील नेत्यांनी रविवारी मंत्रीपदाची शपथ घेऊन सर्वांनाच धक्का दिला. त्यानंतर बुधवारी शरद पवार आणि अजित पवार गटाकडून दोन वेगवेगळ्या बैठका घेण्यात आल्या होत्या. या बैठकीत अजित पवार म्हणाले, ``शरद पवार माझे दैवत आहेत. परंतु आता तुमचं ८२ वर्षांचं वय झालंय. तुम्ही कधी थांबणार आहात की नाही? तुम्ही आता आराम करा आणि आम्हाला आशीर्वाद द्या', अशा शब्दांत शरद पवार यांच्यावर थेट हल्लाबोल चढवला.

यावेळी शऱद पवार यांनी अजित पवार, प्रफुल्ल पटेल यांच्या आरोपांचे खंडन करत भाजपवर हल्ला चढवला. पक्षाध्यक्षपदी माझी नियुक्ती बेकायदेशीर असेल, तर प्रफुल्ल पटेल आणि इतरांनी केलेल्या सर्व नियुक्त्या पूर्णपणे बेकायदेशीर आहेत, असेही शरद पवार म्हणाले. कारण अध्यक्षपदासाठी प्रफुल्ल पटेल यांनीच माझ्या नावाचा प्रस्ताव ठेवला होता. दिल्लीत एकमताने निवड झाली.

शरद पवार यांनी महाराष्ट्र दौऱ्याला नाशिकपासून का सुरुवात केली. याबाबत आपली भूमिका स्पष्ट केली. नाशिक जिल्ह्याचा इतिहास पाहिला तर स्वातंत्र्यपूर्व काळापासून काॅंग्रेस पक्षाला साथ दिली. आमचे सर्वांचे आदर्श यशवंतराव चव्हाण यांना जेव्हा पंतप्रधान पंडित नेहरूंनी बोलावले होते. तेव्हा चव्हाण साहेबांचा लोकसभेला पहिला प्रवेश नाशिकमधून झाला. नाशिककरांनी बिनविरोध त्यांना संसदेत पाठवले. १९८० मी काॅंग्रेसमधून बाहेर पडून पक्ष स्थापन केला. तेव्हा जिल्ह्यातील सर्व जागा आमच्या पक्षाच्या निवडून आल्या. या जिल्ह्याने नेहमीच आमच्या विचारांना साथ दिली आहे. त्यामुळे आपल्या दौऱ्याची सुरुवात नाशिकपासून केली.