Turmeric Cultivation: हळद लागवडीला फटका

Sangli News: राज्यातील हळद लागवडीसाठी शेतकऱ्यांनी पूर्वतयारी केली आहे. वाढती उष्णता आणि मॉन्सूनपूर्व पावसाचा फटका हळद लागवडीवर झाला आहे. येत्या पंधरा दिवसांत हळद लागवड सुरू होईल, असा अंदाज हळद संशोधन केंद्राने व्यक्त केला आहे.

राज्यात सन २०२३-२४ मध्ये ८५ हजार १४८ हेक्टरवर हळदीची लागवड झाली होती. सन २०२४-२५ या वर्षात गत वर्षी राज्यातील शेतकऱ्यांना पाणीटंचाईची समस्या भेडसावली होतीच. तसेच वाढत्या उष्णतेमुळे हळद लागवड लांबणीवर पडली होती. त्यामुळे ७७ हजार ९९२ हेक्टरवर लागवड झाली होती. अर्थात सन २०२३-२४ च्या तुलनेत सन २०२४-२५ मध्ये ७१५६ हेक्टरने लागवड कमी झाली होती. त्यामुळे राज्यातील हळदीचे उत्पादनही घटले. त्यामुळे हळदीचे दरी चांगले राहिले आहेत.

यंदाच्या हंगामात पश्‍चिम महाराष्ट्रातील शेतकरी अक्षय तृतीयेला हळद लागवडीचा मुहूर्त साधतात. तर इतर भागात मे महिन्यात दुसऱ्या-तिसऱ्या आठवड्यापासून हळद लागवड करण्याचे नियोजन शेतकरी करतात. यंदा मार्च महिन्यापासून तापमानात वाढ झाली. हळद पिकासाठी २५ ते २८ अंश सेल्सिअस तापमानाची आवश्यता असते. परंतु तापमान ४० अंशांपर्यंत पोहोचले होते. त्यामुळे शेतकऱ्यांची चिंता वाढली होती.

दरम्यानच्या काळात शेतकऱ्यांनी हळद लागवडीसाठी पूर्वतयारी करून ठेवली आहे. दरम्यान, वाढत्या उष्णतेमुळे शेतकऱ्यांनी हळद लागवड करण्याचे थांबवले होते. त्यामुळे पंधरा दिवस लागवड लांबणीवर पडली असल्याचे हळद संशोधन केंद्राने सांगितले आहे. राज्यातील विविध भागांत मॉन्सूनपूर्व पावसाने हजेरी लावली आहे.

त्यामुळे हळद लागवडीसाठी पोषण वातावरण तयार झाले आहे. मात्र, या पावसामुळे शेतातच पाणी साचून राहिले असल्याने वाफसा आल्याशिवाय हळद लागवड करणे मुश्कील बनले आहे. वाफसा आल्यानंतर हळद लागवड सुरू करण्याचे नियोजन शेतकऱ्यांनी केले आहे. त्यामुळे येत्या पंधरा दिवसांपासून हळद लागवड सुरू होईल.

जिल्ह्यात हळद लागवडीस प्रारंभ

जिल्ह्यातील कृष्णा आणि वारणा काठच्या हळद घेणाऱ्या गावात शेतकऱ्यांनी हळदीची लागवड करण्याचे नियोजन सुरू केले आहे. कसबेडिग्रज येथे हळद लागवड काही प्रमाणातही झाली आहे. जिल्ह्यात चार दिवसांत लागवडीस गती येईल, अशी शक्यता आहे.