Sangli News : हळद लागवडीचा हंगाम सुरू झाला आहे. मात्र, पावसाने दडी मारल्याने बियाण्याची मागणी काही प्रमाणात थंडावली आहे. गेल्या दोन महिन्यांत ४०० टनांची विक्री झाली आहे. हळदीला चांगले दर असल्याने तमिळनाडू आणि आंध्र प्रदेशमधील शेतकऱ्यांनी बियाण्याला ठेवलेली हळदीची विक्री केली असल्याने हळद बियाण्याचा तुटवडा भासण्याचा अंदाज हळद बियाणे व्यापाऱ्यांनी व्यक्त केला आहे.
सांगली बाजार समितीत तमिळनाडू आणि आंध्र प्रदेशमधून हळद बियाणे विक्रीला येते. बाजार समितीत दरवर्षी १५०० ते १८०० टन बियाणे विक्रीस येते. यंदाच्या हंगामासाठी अंदाजे एक हजार टन बियाणे विक्रीसाठी आले असल्याचे व्यापाऱ्यांनी सांगितले आहे. मार्च आणि एप्रिल या दोन महिन्यांत चारशे टनांची विक्री झाली आहे.
सेलम वाणाच्या हळदीच्या बियाण्याचे दर प्रति क्विंटल ६२०० ते ७००० रुपये, तर कडप्पा वाणाच्या हळदीचे बियाणे ४५०० ते ५२०० रुपये प्रति क्विंटल असा दर आहे. गेल्या महिन्यात सेलम बियाण्याचे दर ५५ ते ६० रुपये प्रति किलो तर कडप्पा बियाण्याचे दर ३८ ते ४२ रुपये प्रति किलो असा दर होता. दोन महिन्यांत प्रति किलोस ७ ते १० रुपयांची वाढ झाली असल्याचे व्यापाऱ्यांनी सांगितले.
महाराष्ट्रासह कर्नाटकातील शेतकरी बियाणे खरेदी करण्यासाठी येथील बाजार समितीत दाखल होतात. गतवर्षीही बियाण्यांची टंचाई निर्माण झाली होती. त्यामुळे बियाण्यांचे दरही वाढले होते. यंदा हळदीला दर चांगले असल्याने शेतकऱ्यांनी हळदीची विक्री केली आहे. त्यामुळे यंदाही बियाण्यांची टंचाई भासण्याचा अंदाज असून वेळेत पाऊस सुरू झाला तर दरही वाढतील, असा अंदाज व्यापारी वर्गाने वर्तविला आहे.
पावसाच्या दडीमुळे उठाव मंदावला
वास्तविक पाहता, अक्षय तृतीयेनंतर हळद लागवड करण्यास शेतकरी पुढाकार घेतात. सांगली जिल्ह्यातील कृष्णा आणि वारणा काठच्या पट्ट्यात हळद लागवड काही प्रमाणात झाली आहे. मात्र यंदा उन्हाळी पावसाने दडी मारली आहे. त्यामुळे राज्यासह कर्नाटकातील शेतकऱ्यांनी हळद लागवडीचे नियोजन पुढे ढकलले असल्याचे चित्र आहे. त्यामुळे बियाण्यांचा उठाव मंदावला आहे.
बियाण्यांचा तुटवडा भासण्याचा अंदाज
तमिळनाडू आणि आंध्र प्रदेश या दोन राज्यांतील शेतकरी दरवर्षी हळद विक्रीसाठी बियाणे ठेवले जाते. हे बियाणे सांगली बाजार समितीत विक्रीस येते. मात्र हळदीला चांगले दर असल्याने या राज्यातील शेतकऱ्यांनी बियाणे ठेवण्याऐवजी विक्री करण्यासाठी पुढे आले आहेत. त्यामुळे यंदाच्या हंगामात बियाण्याची कमतरता भासेल असा प्राथमिक अंदाज हळद बियाणे व्यापाऱ्यांनी व्यक्त केला आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.