Agrowon Podcast: तुरीचे दर दबावातच; मूग, हरभरा, लिंबू तसेच काय आहेत आजचे शेवगा भाव?

Market Bulletin:

तुरीचे भाव दबावातच

बाजारातील तुरीची आवक कमी झाली. आवकेचा हंगाम सुरु होऊन ३ महीने झाले. देशातील उत्पादन कमी आहे. त्यामुळे आवक सरासरीपेक्षा कमीच आहे. तरीही तुरीचा भाव हमीभावापेक्षा कमीच आहे. वाढत्या आयातीचा तुरीच्या बाजारावर दबाव आहे. तुरीला सध्या बाजारात ६ हजार ९०० ते ७ हजार ३०० रुपयांच्या दरम्यान भाव मिळत आहे. पुढील काळात तुरीची बाजारातील आवक आणखी कमी होणार आहे. पण आयातीचा दबाव कायम राहण्याची शक्यता आहे. त्यामुळे तुरीच्या बाजारावरील दबावही कायम राहू शकतो, असा अंदाज तूर बाजारातील अभ्यासकांनी व्यक्त केला.

हरभरा दर टिकून

देशातील बाजारात हरभरा दर दबावातच आहेत. हरभऱ्याला मागील काही आठवड्यांपासून उठाव चांगला आहे. लग्न समारंभामुळे हरभऱ्याला मागणी आहे. मात्र देशातील बाजारातील आवक आणि वाढती आयातीचा दबावर दबाव आहे. त्यामुळे हरभऱ्याचे दर एकाच पातळीवर टिकून आहेत. हरभऱ्याला देशातील बाजारात मागील काही आठवड्यांपासून ५ हजार ३०० ते ५ हजार ६०० रुपयांच्या दरम्यान भाव मिळत आहे. हरभऱ्याची देशातील बाजारातील आवक पुढील काळात कमी होणार आहे. मात्र आयात कायम राहील. त्यामुळे दरात काहीसे चढ उतार दिसू शकतात, असा अंदाज हरभरा बाजारातील अभ्यासकांनी व्यक्त केला.

शेवगाला उठाव

बाजारात सध्या शेवग्याची आवक मर्यादीत स्वरुपात होत आहे. तर शेवग्याला चांगला उठाव आहे. त्यामुळे शेवग्याचे भावही टिकून आहेत. राज्यातील बाजारात शेवगा आवक मागणीपेक्षा कमीच असल्याचे व्यापारी सांगत आहेत. त्यामुळे शेवगा प्रतिक्विंटल सरासरी ३ हजार ५०० ते ४ हजार रुपयांच्या दरम्यान विकला जात आहे. पुढील काळात बाजारातील शेवगा आवक कमी होण्याचा अंदाज आहे. वादळी पावसाचा शेवगा पिकाला फटका बसत असल्याचे शेतकरी सांगत आहे. त्याचा परिणाम आवकेवर होऊ शकतो. त्यामुळे शेवग्याचे दर टिकून राहू शकतात, असा अंदाज शेवगा व्यापारी व्यक्त करत आहेत.

लिंबू दर नरमले

वादळी पावसामुळे बाजारातील लिंबाची आवक वाढलेली दिसत आहे. तर दुसरीकडे मागणीही काही प्रमाणात कमी झाली. त्यामुळे दरावही काहीसा दबाव आल्याचे दिसते. लिंबाचे भाव क्विंटलमागे २ हजार रुपयांपर्यंत कमी झाल्याचे व्यापारी आणि शेतकरी सांगत आहेत. सध्या लिंबू ४ हजार ते ४ हजार ५०० रुपयाने विकले जात आहे. वादळी पावसामुळे फळगळ झाल्यामुळे सध्या बाजारातील लिंबाची आवक वाढली. यामुळे लिंबाचे भाव नरमले आहेत. लिंबाची आवक पुढील काळातही कायम राहण्याचा अंदाज आहे. त्यामुळे लिंबाच्या दरातही चढ उतारही कायम राहू शकतात, असा अंदाज व्यापारी व्यक्त करत आहेत.

मुगाचे दर दबावातच

मुगाला चालू हंगामात कमी भाव मिळत आहे. यंदा देशातील मुगाचे उत्पादन वाढण्याचा अंदाज आहे. तसेच आयातही चांगली सुरु आहे. त्यामुळे मुगाच्या भावावर दबाव दिसून येत आहे. चालू हंगामात मुगाने हमीभावाचाही टप्पा पार केला नाही. केंद्राने यंदा मुगाला प्रतिक्विंटल सरासरी ८ हजार ६५२ रुपये हमीभाव जाहीर केला. तर बाजारात सध्या ७ हजार ७ हजार ५०० रुपयांच्या दरम्यान दर मिळत आहे. बाजारातील आवकही पुढील काळात कमी होण्याचा अंदाज आहे. पण उन्हाळी मुगाची आवक पुढे असेल. त्यामुळे मुगाचे भाव पुढील काही आठवडे या पातळीच्या दरम्यानच दिसू शकतात, असा अंदाज व्यापारी व्यक्त करत आहेत.