Nashik News: केंद्र सरकारच्या ग्राहक व्यवहार विभागाच्या भाव स्थिरीकरण निधी योजनेअंतर्गत ‘नाफेड’ (भारतीय राष्ट्रीय कृषी सहकारी विपणन महासंघ) व ‘एनसीसीएफ’ (भारतीय राष्ट्रीय ग्राहक सहकारी महासंघ) या दोन नोडल एजन्सीमार्फत प्रत्येकी १.५ लाख टन खरेदी करण्यासाठी निविदा प्रक्रिया राबविण्यात आली. मात्र अद्यापही कांदा खरेदी सुरू झालेली नाही. मागील वर्षी मे महिन्याच्या दुसऱ्या आठवड्यात खरेदी सुरू झाली होती. यंदा तिसरा आठवडा सुरू होऊनही खरेदी सुरू न झाल्याने लांबणीवर गेल्याची स्थिती आहे.
मागील काही वर्षात कांदा खरेदीतील गैरव्यवहार उघडकीस आल्याने यंदा पारदर्शकता आणण्याचा प्रयत्न असल्याने सर्व बाबी तपासून प्रक्रिया राबवली जात असल्याचे समजते. त्यामुळे केंद्राची मार्गदर्शक तत्त्वे आणि करारानुसार योजनेच्या अनुषंगाने कांदा खरेदी, साठवणूक व वितरण कामांसाठी पात्र सहायक एजन्सींना समाविष्ट करण्याची प्रक्रिया सुरू आहे. मागील वर्षातील खरेदीतील गैरप्रकार रोखण्यासाठी ‘नाफेड’ने यंदा शेतकरी उत्पादक कंपन्या तसेच महासंघांना दूर ठेवून सदस्य सहकारी संस्थांना खरेदीचे काम देण्याचे धोरण हाती घेतले आहे.
‘नाफेड’ने खरेदीसाठी सदस्य सहकारी संस्था, तर ‘एनसीसीएफ’ने शेतकरी उत्पादक कंपन्या, महासंघ, सहकारी संस्था व विविध कार्यकारी सेवा सहकारी संस्थांकडून निविदा मागविल्या होत्या. यात ‘नाफेड’ने वार्षिक उलाढाल ५० लाख रुपये (२८ फेब्रुवारी २०२५अखेर) तर खेळते भांडवल १० लाख यांसह शेतकरी नोंदणी, त्यांच्या पत्त्यांसह जीओ टॅगिंगसह अर्ज आवश्यक आहे.
तर ‘एनसीसीएफ’ने ५ कोटींपर्यंत वार्षिक उलाढाल व १ कोटींचे वार्षिक भांडवल नमूद केले आहे. यात साठवणूक क्षमता ५,००० टन दोन्ही ठिकाणी सारखी आहे. मात्र उलाढाल, खेळते भांडवल या पात्रता निकष वेगवेगळे आहेत. त्यामुळे कोणत्या संस्थांना खरेदीचे काम मिळते. त्यातून मागील वर्षी गैरव्यवहार केलेले दूर ठेवण्यात येतील असेही बोलले जात आहे.
पुढच्या आठवड्यात खरेदी सुरू होण्याची शक्यता
निविदा प्रक्रियेत काही खरेदीदारांची नावे अंतिम झाली आहेत. त्यांच्याकडील साठवणूक क्षमता, कांदा चाळ स्थिती यांसह सर्व क्षेत्रीय पातळीवर केलेल्या उपाययोजना यांच्याबाबत प्रत्यक्ष भौतिक पाहणी केंद्रीय पथकांच्या माध्यमातून केली जात असल्याचे समजते. ‘नाफेड’च्या माध्यमातून १५ सदस्य सहकारी संस्था व ‘एनसीसीएफ’च्या माध्यमातून २५ खरेदीदार असतील. मागील वर्षातील गैरव्यवहार पाहता यंदा पारदर्शकता आणण्यासाठी प्रयत्न होत असल्याचे सूत्रांनी सांगितले. यामध्ये पुढील आठवड्यात खरेदी सुरू होईल असे बोलले जात आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.