Agrowon Podcast: टोमॅटो दरात सुधारणा; सोयाबीन, शेवगा, दोडका तसेच काय आहेत आजचे लिंबू भाव?

Market Bulletin:

टोमॅटो दरात वाढ

मागील काही दिवसांपासून राज्यातील अनेक भागात पाऊस पडत आहे. पावसाचा फटका टोमॅटोला पिकाल बसला. अनेक भागात शेतीत पाणी साचल्याने लागवडी खराब झाल्या. तोडणीला आलेला टोमॅटोचे सततच्या पावसाने नुकसान झाले. यामुळे बाजारातील टोमॅटो आवकही कमी होत आहे. त्यामुळे टोमॅटोच्या भावत सुधारणा दिसून येत आहे. गुणवत्तापूर्ण टोमॅटो अनेक बाजारात २५०० रुपयांपर्यंत विकला जात आहे. तर सरासरी दरपातळी २ हजार रुपयांवर पोचली आहे. यापुढील काळातही टोमॅटोची आवक कमी होणार आहे. त्यामुळे दरातही सुधारणा दिसू शकते, असा अंदाज व्यापारी व्यक्त करत आहेत.

शेवगा दरात सुधारणा

बाजारात सध्या शेवग्याची आवक मर्यादीत स्वरुपात होत आहे. तर शेवग्याला चांगला उठाव आहे. त्यामुळे शेवग्याच्या दरात सुधारणा दिसून आली. राज्यातील बाजारात शेवगा आवक मागणीपेक्षा कमीच असल्याचे व्यापारी सांगत आहेत. त्यामुळे शेवगा प्रतिक्विंटल सरासरी ४ हजार ते ५ हजार रुपयांच्या दरम्यान विकला जात आहे. पुढील काळात बाजारातील शेवगा आवक कमी होण्याचा अंदाज आहे. वादळी पावसाचा शेवगा पिकाला फटका बसत असल्याचे शेतकरी सांगत आहे. त्याचा परिणाम आवकेवर होऊ शकतो. त्यामुळे शेवग्याचे दर टिकून राहू शकतात, असा अंदाज शेवगा व्यापारी व्यक्त करत आहेत.

दोडका आवक घटली

बाजारीत दोडक्याची आवक मोठ्या प्रमाणात कमी झाली. तर दोडक्याला चांगला उठाव आहे. त्यामुळे दोडक्याच्या भावातही सुधारणा दिसून आली. दोडका पिकालाही सततचा पाऊस आणि ढगाळ हवामानाचा फटका बसत आहे. पिकाचे मोठे नुकसान झाल्याचे शेतकरी सांगत आहेत. आवक कमी आणि चांगली मागणी यामुळे दोडक्याचा बाजार ४ हजार ते ५ हजार रुपये प्रतिक्विंटलच्या दरम्यान पोचला. दोडक्याची आवक आणखी काही आठवडे कमीच राहण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत.

लिंबू दर टिकून

पावसामुळे बाजारातील लिंबाची आवक वाढली होती. त्यामुळे दरावरही दबाव आला होता. मात्र मागील दोन आठवड्यांपासून लिंबाचे भाव स्थिर आहेत. सध्या लिंबू ४ हजार ते ४ हजार ५०० रुपयाने विकले जात आहे. वादळी पावसामुळे फळगळ झाल्यामुळे सध्या बाजारातील लिंबाची आवक वाढली. यामुळे लिंबाचे भाव नरमले आहेत. लिंबाची आवक पुढील काळातही कायम राहण्याचा अंदाज आहे. त्यामुळे लिंबाच्या दरातही चढ उतारही कायम राहू शकतात, असा अंदाज व्यापारी व्यक्त करत आहेत

सोयाबीन दबावातच

सोयाबीनचा भाव देशात आणि आंतरराष्ट्रीय बाजारात दबावातच आहे. आंतरराष्ट्रीय बाजारात सोयाबीन आणि सोयापेंडच्या भावात काही प्रमाणात चढ उतार सुरु आहेत. पण भावपातळी एकाच मर्यादेत दिसत आहे. देशातील बाजारातही सोयाबीनचे भाव दबावातच आहेत. बाजारातील सोयाबीनची आवक खूपच कमी झाली. मात्र नाफेड आणि एनसीसीएफची विक्री सुरु आहे. त्याचा दबाव दरावर आहे. सोयाबीनचा भाव आजही ४ हजार १०० ते ४ हजार ३०० रुपयांच्या दरम्यान आहे. सोयाबीन भावाची ही स्थिती आणखी काही आठवडे दिसू शकते, असा अंदाज सोयाबीन बाजारातील अभ्यासकांनी व्यक्त केला.