Agrowon Podcast: लिंबाचे दर तेजीत; पपई, हरभरा, कापूस तसेच काय आहेत सोयाबीन भाव?

Market Bulletin:

लिंबू दर तेजीतच

वाढत्या उन्हाबरोबर लिंबाला चांगली मागणी आहे. तर बाजारातील लिंबाची आवक दिवसेंदिवस कमी होत आहे. त्यामुळे लिंबुचे भाव तेजीत आहेत. लिंबू सध्या बाजारात ६ हजार ते ८ हजार रुपये क्विंटलच्या भावाने विकले जात आहे. बाजारातील आवक पुढील काळात वाढत्या उन्हामुळे कमी होत जाईल. बागांना वाढत्या उष्णतेचा फटका बसत आहे. तसेच अनेक भागात पाण्याची कमतरता असल्याचाही परिणाम उत्पादनावर आहे, असे शेतकरी सांगत आहे. मात्र मागणीत वाढ होईल. त्यामुळे लिंबाच्या भावात सुधारणा अपेक्षित आहे, असे व्यापाऱ्यांनी सांगितले.

पपईला चांगला उठाव

राज्यातील पपईला सध्या चांगली मागणी आहे. त्यामुळे पपईच्या भावातील तेजी टिकून आहे. पपईचे वाढलेले भाव मागील काही दिवसांपासून स्थिर आहेत. वाढती उष्णता आणि रमजान सणामुळे पपईला चांगला उठाव आहे. राज्यातील पपई सध्या देशभरात जात आहे. त्यामुळे पपईला सध्या १७०० ते २ हजार रुपयांचा भाव मिळत आहे. यंदा पपईची लागवड सरासरीपेक्षा कमीच होती. त्यामुळे आवकही मर्यादीत आहे. पपईचा बाजारभाव आणखी काही आठवडे कायम राहू शकतो, असा अंदाज पपई बाजारातील अभ्यासकांनी व्यक्त केला.

हरभरा दबावातच

सरकारच्या धोरणामुळे हरभरा बाजारावरील दबाव कायम आहे. बाजार समित्यांमध्ये हरभऱ्याची आवकही सुधारत असल्याचे व्यापारी सांगत आहेत. आज बाजारात हरभरा ५ हजार ते ५ हजार २०० रुपयांच्या दरम्यान हरभरा विकला गेला. बाजारातील आवकही वाढत आहे. पुढील आठवड्यात आवकेचा दबाव वाढणार आहे. तर दुसरीकडे पिवळा वाटाणा आयातीचा दबाव हरभरा दरावर दिसून येईल. त्यामुळे हरभरा दर पुढील महीना दीड महिना दबावातच राहतील, असा अंदाज हरभरा बाजारातील अभ्यासकांनी व्यक्त केला.

सोयाबीनमध्ये काहीशी सुधारणा

सोयाबीनला उठाव मिळाल्याने दरात काहीशी सुधारणा दिसून आली. प्रक्रिया प्लांट्सनी आजही सोयाबीन खरेदीच्या भावात सरासरी ५० रुपयांची वाढ केली होती. त्यामुळे प्रक्रिया प्लांट्सचे भाव ४ हजार ४०० ते ४ हजार ५५० रुपयांच्या दरम्यान काढले होते. तर बाजार समित्यांमध्येही खरेदी दरातही क्विंटलमागे ५० रुपयांपर्यंत सुधारणा दिसून आली. आज सोयाबीन ४ हजार ते ४ हजार २०० रुपयाने विकले गेले. देशातील चांगला पुरवठा आणि आंतरराष्ट्रीय बाजारातील मंदी यामुळे दरात मोठ्या वाढीची शक्यता नाही, असे सोयाबीन बाजारातील अभ्यासकांनी सांगितले.

कापूस दर टिकून

कापसाचे भाव चालू आठवड्यात काहीसे स्थिर राहीले. बाजारातील कापसाची आवक कमी झाली तर दुसरीकडे कापसाला चांगला उठाव मिळाला. त्यामुळे कापसाच्या भावात सुधारणा दिसून आली होती. ही सुधारणा आजही टिकून होती. त्यामुळे बाजारात कापसाला सरासरी ७ हजार १०० ते ७  हजार ५०० रुपयांच्या दरम्यान भाव मिळाला. बाजारातील कापसाची आवक पुढील आठवड्यापासून आणखी कमी होत जाईल. त्यामुळे कापसाच्या दरालाही आधार मिळेल, असे कापूस बाजारातील अभ्यासकांनी सांगितले.