Agrowon Podcast: टोमॅटो दरात सुधारणा; सिताफळाला चांगला भाव, गवार तेजीत तर हळद-केळी दर स्थिर

Market Bulletin:

टोमॅटोच्या दरात सुधारणा

टोमॅटोच्या दरात मागील काही आठवड्यांपासून सुधारणा दिसून येत आहे. टोमॅटोची बाजारातील आवक कमी आहे. यंदा वाढलेल्या उन्हामुळे टोमॅटोच्या लागवडी प्रभावित झाल्या होत्या. तर मे महिन्यापासून सुरु असलेल्या पावसाचाही पिकाला फटका बसला. यामुळे तोडा कमी येत आहे. सध्या टोमॅटोला सरासरी ३ हजार ते ३ हजार ५०० रुपयांचा दर मिळत आहे. काही बाजारात उचांकी ४ हजारही भाव मिळाला. टोमॅटोची आवक पुढील काही आठवडे कमीच राहण्याची शक्यता आहे. त्यामुळे टोमॅटोचे भावही टिकून राहतील, असा अंदाज टोमॅटो बाजारातील व्यापारी व्यक्त करत आहेत. 

हळदीच्या दरात चढ उतार

देशातील बाजारात हळदीच्या भावात मागील काही आठवड्यांपासून चढ उतार सुरु आहेत. हळदीला बाजारात अजून अपेक्षेप्रमाणे उठाव मिळाला नाही. सणांची मागणी अपेक्षेनुसार अजून सुरु झाली नाही. याचा परिणाम दरावर दिसत आहे. निर्यातीची गतीही धिमी आहे. यामुळे दरात काहीसे चढ उतार सुरु आहेत. सध्या हळदीला सरासरी १० हजार ते ११ हजार रुपयांच्या दरम्यान दर मिळत आहेत. हळदीला पुढील काही आठवड्यांमध्ये सणांची मागणी येईल. त्या काळात हळदीला उठाव राहून दरातही काहीशी सुधारणा होऊ शकते, असा अंदाज हळद बाजारातील अभ्यासकांनी व्यक्त केला. 

सिताफळाला चांगला भाव

राज्यातील बाजारांमध्ये सिताफळाची आवक सुरु झाली. सध्या आवकेचा दबाव कमी आहे. अनेक भागातील काढणी सुरु व्हायची आहे. तर सिताफळाला ग्राहकांचीही पसंती मिळत आहे. यामुळे दरही चांगले मिळत आहेत. सध्या सिताफळाला प्रतिक्विंटल सरासरी ४ हजार ते ४ हजार ५०० रुपयांच्या दरम्यान दर मिळत आहे. पुणे बाजारात सध्या चांगली आवक दिसत आहे. त्यामुळे सरासरी दर काहीसे कमी आहेत. मात्र मुंबई बाजारात सिताफळ सरासरी ७ हजार रुपयांच्या दरम्यान विकले जात आहे. सिताफळाची आवक पुढील काळात हळूहळू सुधारण्याची शक्यता आहे. त्यामुळे सिताफळाच्या दरावरही दबाव येईल, असा अंदाज व्यापारी व्यक्त करत आहेत. 

गवारचे दर तेजीत

राज्यातील बाजारात सध्या गवारची आवक कमी आहे. तर बाजारात उठाव चांगला मिळत आहे. गवार पिकाला पाऊस सुरु होण्याच्या आधापासूनच गवार तेजीत आहे. मागील काही दिवसांमध्ये दरात काहीशी वाढ दिसून आली. मात्र अद्यापही आवक मागणीच्या तुलनेत कमी आहे. याचा आधार गवारच्या दराला मिळत आहे. सध्या गवार ६ हजार ते ६ हजार ५०० रुपये प्रतिक्विंटलने विकली जात आहे. गवारची बाजारातील आवक पुढील काही आठवडे कमीच राहण्याचा अंदाज आहे. त्यामुळे गवारचे दर टिकून राहू शकतात, असा अंदाज बाजारातील व्यापारी आणि जाणकारांनी व्यक्त केला.

केळीचे दर टिकून

राज्यात मागील २ आठवड्यांपासून केळीच्या दरात काहीशी नरमाई आली होती. केळीचे दर आवक स्थिर असतनाही काहीशे नरमले आहेत. आता दरपातळी मागील आठवडाभरात काहीशी स्थिरावली आहे. आता श्रावण महिन्यात केळीला चांगला उठाव मिळत आहे. उपवास आणि विधीमुळे केळीला मागणी येत आहे. मात्र याचा केळी दराला सध्यातरी फायदा होताना दिसत नाही. केळीला सध्या प्रतिक्विंट सरासरी १ हजार ६०० ते १ हजार ८०० रुपयांच्या दरम्यान दर मिळत आहे. केळीची पुढील काळात बाजारातील आवक सुधारण्याचा अंदाज आहे. त्यामुळे दरात काहीसे चढ उतार दिसू शकतात, असा अंदाज केळी बाजारातील अभ्यासकांनी व्यक्त केला.