Agrowon Podcast: मक्याचा दर स्थिर; गाजर- भेंडीचे दर टिकून, आले दरात सुधारणा तर उडदाचे दर कमी

Market Bulletin:

गाजराचे दर टिकून

बाजारातील गाजराची आवक कमीच आहे. त्याचा भावाला आधार मिळत आहे. गाजराला बाजारात सध्या उठाव आहे. सततच्या पावसामुळे काही भागात गाजर पिकाला फटका बसला. तसेच अनेक भागात पीक वाढीच्या अवस्थेत आहे. यामुळे सध्याची आवक मर्यादीत आहे. त्याचा दराला आधार आहे. सध्या गाजर १ हजार ७०० ते २ हजार २०० रुपयांच्या दरम्यान विकले जात आहे. गाजराची बाजारातील आवक पुढील काही आठवडे मर्यादीतच राहण्याची शक्यता आहे. त्यामुळे दरही टिकून राहू शकतात, असा अंदाज व्यापारी व्यक्त करत आहेत.

भेंडीचे दर टिकून

भेंडीचे दर मागील २ आठवड्यांपासून बाजारात टिकून आहेत. पावसाचा फटका भेंडी पिकाला बसत आहे. परिणामी बाजारातील आवक मर्यादीत आहे. राज्यातील बहुतांशी बाजारांमधील भेंडीची आवक ५० क्विंटलपेक्षाही कमी आहे. केवळ पुणे, मुंबई, नाशिक, नागपूर आणि अमरावती अशा बाजारांमध्ये आवक काहीशी अधिक दिसत आहे. त्यामुळे सध्या भेंडीला २ हजार ५०० ते ३ हजार रुपये दर मिळत आहे. काही बाजारांमध्ये उचांकी अधिक आहे. मुंबई बाजारात सरासरी ३ हजार ३०० रुपये दर मिळत आहे. बाजारातील भेंडीची आवक काही आठवडे मर्यादीतच राहण्याची शक्यता आहे. त्यामुळे दरही टिकून राहू शकतात, असा अंदाज भेंडी बाजारातील व्यापारी व्यक्त करत आहेत.

आले दरात सुधारणा

आले पिकाच्या दरातील घसरणीमुळे शेतकऱ्यांची चिंता वाढली होती. मात्र मागील आठ ते दहा दिवसांपासून दरात सुधारणा होत आहे. आल्याच्या भावात मागील महिन्याच्या तुलनेत १०० ते ३०० रुपयांपर्यंत सुधारणा झाली आहे. सध्या प्रतिक्विंटल २ हजार ५०० ते ३ हजार ५०० रुपयांपर्यंत दर मिळत आहे. पावसामुळे आले पीक काढता येत नसल्याने तुटवडा भासत असल्याने दरात सुधारणा झाल्याचे व्यापारी सांगत आहेत. दर सुधारणेमुळे पुन्हा एकदा आल्याची आवक सुधारत आहे. आल्याला बाजारात मागणीही आहे. मात्र, आवकेचा दबाव मागील दोन महीने आल्याच्या भावावर दिसून आला.

मका बाजार स्थिरावला

मक्याला देशात चांगली मागणी आहे. मात्र, वाढलेले उत्पादन आणि वाढती आयात यामुळे दरावर दबाव आहे. तसेच ज्या इथेनाॅलमुळे मक्याचे भाव मागील २ वर्षांमध्ये चांगले सुधारले होते. त्या इथेनाॅलसाठी आता तांदळाचा पर्यायही उपलब्ध झाला आहे. त्यामुळे मक्याचे दर एका मर्यादेच्या पुढे सरकले तर मक्याला मागणी कमी होऊन तांदळाला मागणी येऊ शकते. यामुळे दर स्थिर दिसत आहेत. सध्या मका २ हजार १०० ते २ हजार ३०० रुपयांच्या दरम्यान विकला जात आहे. मक्याला देशात चांगली मागणी आहे. मात्र भाववाढीला मर्यादा असल्याचे जाणकार सांगत आहेत.

उडदाचे भाव दबावातच

उडदाचे भाव मागील २ महिन्यांपासून दबावातच आहेत. एकीकडे राज्यातील बाजारात उडदाची आवक कमी आहे. मात्र, वाढत्या आयातीमुळे निर्माण झालेल्या साठ्याचा दरावर परिणाम होत आहे. पुढील महीनाभरात देशातील काही बाजारांमध्ये नव्या उडदाची आवकही सुरु होईल. याचाही दबाव दरावर आहे. देशातील बाजारात सध्या उडदाला सरासरी ६ हजार ३०० ते ६ हजार ७०० रुपयांच्या दरम्यान भाव मिळत आहे. देशात यंदा उडदाची आयात वाढली. तसेच देशातील उत्पादनही चांगले राहीले. त्यामुळे पुरवठा चांगला आहे. याचा दबाव दरावर येत आहे. उडदाची आवक खरिपातील माल येईपर्यंत कमीच राहील. मात्र, देशातील साठ्याचा दरावर दाबव राहील. त्यामुळे भाव पुढील काही आठवडे स्थिर राहू शकतात, असा अंदाज उडीद बाजारातील अभ्यासकांनी व्यक्त केला.