Agrowon Podcast: सोयाबीन व गवार दर टिकून; आले-पपई दरात सुधारणा, तर भेंडी दर स्थिर

Market Bulletin:

सोयाबीनचा भाव टिकून

देशातील बाजारात सोयाबीनचा भाव टिकून आहे. सोयाबीनला सध्या उठाव मिळत आहे. यंदा शेतकऱ्यांकडे शिल्लक सोयाबीन कमी आहे. त्यातच प्रक्रिया प्लांट्सकडे पुरेसे सोयाबीन नाही. त्यातच खाद्यतेल आणि सोयापेंडच्या दरात सुधारणा झाली आहे. त्यामुळे सोयाबीनचे दरही टिकून आहेत. सध्या बाजारात सोयाबीन प्रतिक्विंटल सरासरी ४ हजार ४०० ते ४ हजार ७०० रुपयांचा दर मिळत आहे. पुढील काही आठवडे देशातील बाजारात ही स्थिती कायम राहण्याची शक्यता आहे. त्यामुळे सोयाबीनचे दरही टिकून राहू शकतात, असा अंदाज सोयाबीन बाजारातील अभ्यासकांनी व्यक्त केला.

आले दरात सुधारणा

आले पिकाच्या दरातील घसरणीमुळे शेतकऱ्यांची चिंता वाढली होती. मात्र मागील महिनाभरापासून दारत काहिशी सुधारणा झाली आहे. मागील आठवडाभरातही दर काहीसे वाढले आहेत. आल्याला बाजारात सध्या प्रतिक्विंटल ३ हजार ५०० ते ४ हजार रुपयांपर्यंत दर मिळत आहे. पावसामुळे आले पीक काढता येत नसल्याने तुटवडा भासत असल्याने दरात सुधारणा झाल्याचे व्यापारी सांगत आहेत. दर सुधारणेमुळे पुन्हा एकदा आल्याची आवक सुधारत आहे. आल्याला बाजारात मागणीही आहे. मात्र, आवकेचा दबाव मागील दोन महीने आल्याच्या भावावर दिसून आला.

गवार तेजीत

राज्यातील बाजारात गवारचे दर तेजीत आहेत. बाजारातील आवक कमी आणि चांगला उठाव यामुळे दर वाढले आहेत. पावसामुळे गवारची आवक कमीच आहे. राज्यातील बहतांशी भागाता पिकाचे नुकसान झाले आहे. तसेच नव्या लागवडी तोडणीला यायला उशीर आहे. सध्या बाजारात गावरला ६ हजार ते ८ हजार रुपये गुणवत्तेनुसार दर मिळत आहे. राज्यातील केवळ पुणे आणि नागपूर जिल्ह्यातील बाजारांमध्ये आवक १०० क्विंटलपेक्षा आधिक दिसत आहे. इतर बाजारांमधील आवक ५० क्विंटलपेक्षाही कमी आहे. गवार बाजारातील ही स्थिती पुढील काही आठवडे कायम राहू शकते, असा अंदाज गवार बाजारातील अभ्यासकांनी व्यक्त केला.

भेंडीचे दर टिकून

भेंडीचे दर मागील २ आठवड्यांपासून बाजारात टिकून आहेत. पावसाचा फटका भेंडी पिकाला बसत आहे. परिणामी बाजारातील आवक मर्यादीत आहे. राज्यातील बहुतांशी बाजारांमधील भेंडीची आवक कमी आहे. त्यामुळे सध्या भेंडीला २ हजार ५०० ते ३ हजार रुपये दर मिळत आहे. काही बाजारांमध्ये उचांकी अधिक आहे. मुंबई बाजारात सरासरी ३ हजार रुपये दर मिळत आहे. बाजारातील भेंडीची आवक काही आठवडे मर्यादीतच राहण्याची शक्यता आहे. त्यामुळे दरही टिकून राहू शकतात, असा अंदाज भेंडी बाजारातील व्यापारी व्यक्त करत आहेत.

पपई दरात सुधारणा

पपईला मागणी असतानाच बाजारातील आवक मात्र कमी आहे. त्यामुळे पपईच्या दरात वाढ झाली आहे. सध्या राज्यात पपईचे उत्पादन कमी आहे. त्यातही दर्जेदार पपईची टंचाई भासत आहे. राज्यातील बाजारातही पपईची मागणी आहे. उत्तर भारतातूनही मागणी आहे. यामुळे पपई दरात किलोमागे दोन ते तीन रुपयांची सुधारणा झाली आहे. त्यामुळे शेतकऱ्यांना जागेवर सध्या १६०० ते १८०० रुपये प्रतिक्विंटलचा दर मिळत आहे. श्रावणमास व अन्य कारणांमुळे पपईला मागणी आहे. दुसरीकडे बाजारात पपईची आवक कमी आहे. त्यामुळे पुढील काही आठवडे दर स्थिर राहू शकतात, असा अंदाज पपई बाजारातील व्यापाऱ्यांनी व्यक्त केला.