Agrowon Podcast: कांद्याच्या दरात चढ-उतार; मका स्थिर, मिरचीचे दर तेजीत, तर दोडका महागला

Market Bulletin:

मका स्थिर

मक्याचा बाजार मागील काही दिवसांपासून स्थिर आहे. बाजारातील मक्याची आवक सध्या कमी झाली. मात्र, यंदा मक्याचे उत्पादन वाढले आहे. तसेच वाढलेल्या दरात आयात वाढण्याचाही धोका आहे. मक्याचा स्टाॅकही आहे. त्यामुळे मक्याचे भाव स्थिर आहेत. सध्या देशात मक्याला सरासरी २ हजार ते २ हजार २०० रुपयांच्या दरम्यान भाव मिळत आहे. चालू खरिपातही मक्याची लगावड वाढण्याचा अंदाज आहे. मात्र दुसरीकडे मक्याला इथेनाॅलसाठी चांगली मागणी आहे. यामुळे पुढील काळात मक्याच्या दरात २०० ते ३०० रुपयांपर्यंत सुधारणा अपेक्षित आहे, असे मका बाजारातील अभ्यासकांनी सांगितले.

हिरवी मिरची तेजीतच

राज्यातील बाजारात मागील काही आठवड्यांपासून हिरव्या मिरचीची आवक कमीच आहे. तर दुसरीकडे मागणी आहे. त्यामुळे दरही स्थिर दिसत आहेत. सध्या लग्न सराई आणि समारंभामुळे हिरव्या मिरचीला चांगला उठाव आहे. त्यामुळे हिरवी मिरची ३ हजार ते ३ हजार ५०० रुपयाने विकली जात आहे. हिरव्या मिरचीची आवक आणखी काही आठवडे वाढण्याची शक्यता नाही. त्यामुळे बाजारातील आवकही सरासरी राहण्याचा अंदाज आहे. त्यामुळे हिरव्या मिरचीचे दरही पुढील काही आठवडे कायम राहू शकतात, असा अंदाज व्यापारी व्यक्त करत आहेत.

दोडका आवक घटली

बाजारीत दोडक्याची आवक मोठ्या प्रमाणात कमी झाली. तर दोडक्याला चांगला उठाव आहे. त्यामुळे दोडक्याच्या भावातही सुधारणा दिसून आली. दोडका पिकालाही सततचा पाऊस आणि ढगाळ हवामानाचा फटका बसत आहे. पिकाचे मोठे नुकसान झाल्याचे शेतकरी सांगत आहेत. आवक कमी आणि चांगली मागणी यामुळे दोडक्याचा बाजार ४ हजार ते ५ हजार रुपये प्रतिक्विंटलच्या दरम्यान पोचला. दोडक्याची आवक आणखी काही आठवडे कमीच राहण्याची शक्यता आहे. त्यामुळे दरही टिकून राहतील, असा अंदाज व्यापारी व्यक्त करत आहेत.

गुळाचे भाव टिकून

देशात यंदा उसाचे उत्पादन कमी झाले. कारखान्यांनाही उसाची टंचाई भासत होती. गुऱ्हाळांनाही यंदा ऊस कमी मिळाल्याचे गुऱ्हाळचालकांनी सांगितले. याचा परिणाम गूळ उत्पादनावर झाला. गेल्यावर्षीपेक्षा यंदाचे गुळाचे उत्पादन कमी असल्याचे व्यापारी सांगत आहेत. त्यामुळे गुळाचे भाव टिकून आहेत. सध्या गुळाला गुणवत्तेप्रमाणे राज्यातील बाजारात ४ हजार ते ४ हजार ५०० रुपयांच्या दरम्यान भाव मिळत आहे. यापुढील काळात गुळाला मागणी वाढत जाऊन दरालाही आधार मिळू शकतो, असा अंदाज गूळ बाजारातील व्यापारी व्यक्त करत आहेत.

कांदा दरात चढ उतार

कांदा दरात काहीसे चढ उतार आहेत. सरासरी दरपातळी काही कमी झालेली दिसत आहे. राज्यातील काही भागात पावसामुळे कांदा आवक काहीशी प्रभावित होत असल्याचे व्यापारी सांगत आहेत. तर बाजारात आजही गुणवत्तापूर्ण मालाची कमतरता असल्याचे व्यापाऱ्यांनी सांगितले. त्यामुळे गुणवत्ता कमी असलेल्या मालाचे भाव काहीसे नरमले आहेत. सध्या कांद्याचा राज्यापतळीवरचा सरासरी दर १२०० ते १५०० रुपयांवर आला आहे. पुढील काही दिवस बाजारातील ही परिस्थिती कायम राहू शकते. आवक आणि दरात काहीसे चढ उतार राहतील, असे अभ्यासकांनी सांगितले.