Pune News : चालू हंगामात आठ महिन्यांमध्ये सोयाबीनची बाजारातील आवक ८३ लाख टनांवर पोहोचली. त्यापैकी ७९ लाख टनांचे गाळप झाले. आता व्यापारी आणि शेतकऱ्यांकडे निम्मे म्हणजे २२ लाख टन सोयाबीन आहे. तर नाफेडकडे १६ लाख टनांचा साठा आहे. भारतातून जवळपास १५ लाख टन सोयापेंडची निर्यात झाली असून, जर्मनी सर्वांत मोठा खरेदीदार ठरला, असे सोयाबीन प्रोसेसर्स असोसिएशन ऑफ इंडियाने (सोपा) म्हटले आहे.
सोपाने आपला जून महिन्यातील अहवाल प्रसिध्द केला. त्यानुसार मे महिन्यात केवळ ६ लाख टन सोयाबीन बाजारात विक्रीसाठी आले होते. एप्रिल महिन्यात साडेपाच लाख टन सोयाबीनची आवक झाली होती. सोयाबीन हंगाम ऑक्टोबर ते सप्टेंबर असा असतो. चालू हंगाम ऑक्टोबर २०२४ पासून सुरू झाला असून, मेपर्यंत ८ महिने पूर्ण झाले. या ८ महिन्यांतील बाजारातील आवक, गाळप, निर्यात, शिल्लक स्टाॅक याची माहिती सोपाने दिली.
ऑक्टोबरपासून मे महिन्यापर्यंत देशातील बाजारात ८३ लाख टन सोयाबीनची आवक झाली होती. त्यापैकी ७९ लाख टनांचे गाळप झाले. या गाळपातून ६२ लाख टन सोयापेंडची निर्मिती झाली. सोयापेंडचा देशातील वापर ४२ लाख टन राहिला. तर निर्यात जवळपास १५ लाख टन झाली. देशातील सोयापेंड निर्मिती, वापर आणि निर्यात गेल्या वर्षीपेक्षा कमीच आहे.
शेतकऱ्यांकडे कमी साठा
मागील हंगामात जून महिन्यात सोयाबीनचा साठा शेतकरी, व्यापारी आणि प्रक्रिया प्लांट्सकडे ४५ लाख टन होता. पण यंदा सुरुवातीपासूनच मंदी असल्याने यंदा शेतकरी आणि व्यापारी यांनी कमी साठा ठेवला. तर प्रक्रिया प्लांट्सही गरजेनुसार सोयाबीनची खरेदी करत आहेत. यंदा केवळ २२ लाख टनांचा साठा असल्याचे सोपाने म्हटले आहे.
नाफेडकडून विक्री सुरूच
नाफेड आणि एनसीसीएफने यंदाच्या हंगामात जवळपास २० लाख टन सोयाबीनची खरेदी केली होती. त्यापैकी जवळपास ४ लाख टन सोयाबीन आतापर्यंत विकले. तर जवळपास १६ लाख टनांचा स्टाॅक आहे. हा स्टाॅकही नाफेड आणि एनसीसीएफ विकत आहे. सोयाबीनला लिलावात ४ हजार ३०० रुपयांच्या दरम्यान सरासरी भाव मिळत आहे.
जर्मनी सोयापेंडचा मोठा ग्राहक
भारताने मे महिन्यापर्यंत जवळपास १५ लाख टन सोयापेंडची निर्यात केली. यापैकी सर्वाधिक निर्यात जर्मनीला झाली. जर्मनीने २ लाख १२ हजार टनांची आयात केली. त्यानंतर फ्रान्सने १ लाख ६१ हजार टनांची आयात केली.
बांगलादेश १ लाख ५४ हजार टन आणि केनियाने १ लाख ४ हजार टनांची आयात केली. यंदाची आतापर्यंतची एकूण निर्यात गेल्या वर्षी याच कालावधीत झालेल्या निर्यातीपेक्षा दीड लाख टनांनी कमी आहे. आंतरराष्ट्रीय बाजारात भाव कमी असल्याने देशातही भाव दबावातच राहिले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.